› 選擇地區
三藩市
紐約
洛杉磯
其他美國地區
香港 台灣 北美
 
2015年10月29日

咖喱牛腩:求你不要走 - 牽牛

離開容易,留低好難,係之前偉大嘅特首教曉我哋嘅道理;當有官員、特首被問責,保皇人士就會提出:「如果佢唔做,邊個可以頂上,你夠料咩?」勢估唔到連堂堂宇宙級領隊摩連奴(右)都用呢個藉口嚟回應:「你搵到個比我好嘅領隊,我咪走囉。」所以摩連奴真係唔炒得。
車仔上星期又輸波,10場聯賽輸到第五場,仲多過屈福特、西布朗、史篤城,但要知道對手係排第三嘅韋斯咸,今季出晒名鋤強扶弱,車仔要證實自己仲係強隊,輸畀韋咸都無可厚非。韋咸今季贏過曼城、阿仙奴、利物浦,唔通比歷連尼、雲格、羅渣士都要炒咩,噢,sorry,羅渣士真係炒咗㖭。
而且摩連奴真係唔炒得,對完韋咸之後,佢老哥帶埋班教練團同球員唔出席賽後記者會,英國傳媒就真係頭都大埋,《每日郵報》、《太陽報》呢啲,老總落定order整番兩三個頭版插寸王,𠵱家冇摩連奴回應,又冇得引述佢啲金句,真係打亂晒部署,搞到又要翻炒接班人選呢啲舊聞,甚麼肥安、軒迪克,聽過晒啦。所以當矚目新聞短缺嘅時代,連飛機delay都可以上頭版,摩連奴對英格蘭體育新聞界,甚至整個傳媒行業係幾咁重要。
前季曼聯由莫耶斯主理,上季到雲高爾,小弟同一班戰友都戲言,英超各隊都諗好計,定時定候送分畀曼聯,等佢哋唔好炒呢兩位天才領隊。車仔周六對利物浦呢場大戰,賽前吹晒風話車仔再唔掂就炒寸王,唔知利物浦領隊高路普又會唔會捱義氣失分呢?
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載