› 選擇地區
三藩市
紐約
洛杉磯
其他美國地區
香港 台灣 北美
 
2015年11月06日

體壇拾趣:控衞大戰
居里勇挫CP3

CP3(紅衫)今場波表現唔差,但論進攻火力都係唔及居里(白衫)。

周三NBA常規賽西岸大戰,賽前開季四戰全勝嘅勇士同快艇對壘。今場波亦係兩大控衞之戰,結果史堤芬居里(Stephen Curry)繼續着火,三分11射七中攻入全場最高嘅31分,力壓基斯保羅(Chris Paul,CP3),領勇士主場以112:108擊敗快艇,開季五戰全勝。

勇士挫快艇開季五戰全勝

居里喺今場波第一次起手就命中三分,不過打咗唔夠三分鐘就因為兩犯要埋場邊唞唞;到第二節出番嚟居里醒神晒,完半場前入三分兼搏埋對手犯規就最精采。到咗下半場居里繼續係關鍵先生,勇士喺第四節初段一路落後,居里淨番五分鐘引咗D佐敦(DeAndre Jordan)出嚟三分線,crossover後又中三分將比數反超前至100:99。之後戰情繼續緊湊,但居里喺完場前一分鐘又入三分,助勇士喺呢場西岸大戰擊敗快艇。其實快艇嘅CP3表現都唔差,今場波入24分兼有九次助攻,但對住着晒火嘅居里真係被比下去,現階段數NBA最強嘅PG,都仲係非居里莫屬。
經過今仗後,居里已經連續78場常規賽射入三分波,追平前魔術球員丹尼斯史葛(Dennis Scott)排喺歷來第四位;另外佢開季五場常規賽共入28球三分,亦係前無古人。勇士喺西岸獨領風騷,呢邊廂速龍就喺東岸威晒,佢哋繼續刷新隊史最佳開季紀錄,周三以103:98作客擊敗雷霆,一樣係五戰全勝。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載