› 選擇地區
三藩市
紐約
洛杉磯
其他美國地區
香港 台灣 北美
 
2015年11月12日

咖喱牛腩:《火鳳》球壇版 - 咖喱

前兩日,牽牛兄講開佢愛隊法國國家隊,小弟第一時間就諗起賓施馬勒索華布拿呢單奇聞。呢單嘢奇在,真係諗爆頭都諗唔到賓施馬嘅動機,從表面證供睇,佢似乎只係毫無法律意識,幫咗罪犯傳話,所以惹禍上身。不過,網民素來想像力豐富,幫呢單嘢諗咗好多搞笑情節出嚟。
最出名嘅情節係雲爺爺出手,屈賓施馬坐監。雲爺爺係邊個?咪就係阿仙奴領隊雲格(圖)。綜合網民想像力,佢老人家一直都想買賓施馬,但傳咗好耐都係險簽。佢覺得賓施馬不識抬舉,決定懲罰佢,所以雲爺爺就運用喺法國嘅人脈網絡,搞到賓施馬坐監。
雲爺爺嘅神機妙算點止咁小兒科,佢呢排多咗個花名叫雲志誠,而法比加斯就叫做法永仁。睇過《無間道》嘅朋友,應該估到嘞啩!早前盛傳法比加斯帶頭反摩連奴,即刻有網民認為法比係雲格放入車仔嘅臥底,法比先離間施治同摩佬嘅關係,令到施治轉會阿仙奴。今季,法比除咗踢得極差外,再透過伊娃事件瓦解車仔,更一度令摩佬捉錯內鬼,差啲整走夏薩特。仲有人話雲爺爺放尹佩斯畀曼聯都係深謀遠慮,等尹佩斯幫費格遜贏多次英超,叫費Sir安心退休。曼聯冇費Sir,摩佬又一身蟻,仲唔到阿仙奴稱霸英超?網民嘅想像力簡直可以出番本《火鳳燎原》球壇版,而雲格應該係八奇之首。
講起雲爺爺又太興奮,講番賓施馬單嘢先,有網民認為基奧特先係幕後黑手。根據黃子華喺《棟篤笑》講過嘅陰謀論,婚紗店老闆最想同性戀合法化;只要搵到既得利益者,就可以睇透成件事,最想賓施馬坐監嘅肯定係法國後備中鋒基奧特啦。文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載