› 選擇地區
三藩市
紐約
洛杉磯
其他美國地區
香港 台灣 北美
 
2015年11月24日

趣趣地:米拿開P紅藍球星撞正

踢波同慈善舞會本身就冇乜衝突,但占士米拿𠵱家咁搞,就有啲尷尬囉!呢位英格蘭中場上周六倒戈「藍月」,幫利物浦作客4:1大炒曼城;到咗禮拜日,佢就搞咗個叫「Nightmare before Christmas」嘅慈善舞會,仲邀請咗好多利物浦現任隊友同埋曼城前隊友一齊出席。紅軍方面有史杜列治、拉爾拉拿、高路托尼;曼城就有赫特、基捷基治等;佢哋好多都帶埋另一半去,男嘅西裝骨骨,女嘅花枝招展。

不過,早一日兩隊先至大戰完,唔知仇人見面會唔會面左左呢?尤其係曼城嗰班,啱啱俾你炒完一場,搞到榜首都冇埋,之後就參加個叫「聖誕前惡夢」嘅舞會,真係咪話唔應景!特別係赫特,諗起一日前先俾利物浦攻入四球,或者度氣仲頂住頂住。另外,占士米拿都幾有號召力,吸引到唔少球壇中人嚟參加舞會,例如巴利、尼史葛同韋拉等。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載