› 選擇地區
三藩市
紐約
洛杉磯
其他美國地區
香港 台灣 北美
 
2015年12月27日

Sunday Fever:那夜清晨我在台北慢慢跑 - 馬啟仁

話說上周喺台北跑半馬,10點瞓得着嘅日子實在唔多,一年就一、兩次,每次都係因為第日要跑步。好怪,如果係踢波的話,就算更早要起身都唔會早瞓一分鐘,跑步就唔同,瞓少咗隨時多樣嘢瀨。
三點自然醒,腦筋清醒咗,但身體髮膚未,熱水沖涼照頭淋,食麵包飲果汁,懶懶閒床上拉筋拉足半粒鐘。好怪,明知拉筋咁重要,偏偏平時練習就只會拉半分鐘。帶齊嘢,一個人走在四點嘅忠孝東路向起點進發。
雖然對台灣有情意結,但今次亦唔係冇投訴嘅,起跑竟然全馬、半馬兩萬人一齊出發,逼咗五分鐘都未跑得郁,無發生意外算好彩。亦可能由於開得太慢,所以一到大路好多人包括我,就放監咁喪跑咗幾K,咁過來人都知道,開頭有幾耐風流,之後有幾耐墮後啦。投訴二,原本打氣係熱情,飲料係足夠,景色係怡人,但去到最後兩K時仲有一條大煞風景好窄好暗嘅隧道,人已經莫氣嘞,仲要進入空氣稀薄嘅環境,所以最後唔少跑友都以行代跑嘞,差啲引誘到我行埋一份。
完事,拐吓拐吓食早餐行誠品睇《康熙》瞓晏覺,呢種悠閒只有跑到死去活來之後享受,先至唔內疚。瞓瞓吓收到短訊:華山有Show睇,預你?唔係唔想睇,但有乜Show好睇過愛隊大戰吖,惟有放棄宇宙人期待槌仔幫,上網揾定條Link,氣氛高漲直到開波之前,因為場波真係好悶,定係我確實已經筋疲力盡,總之回復知覺嘅時候,畫面已經斷線,上網Check吓又一場0:0,順便睇埋半馬賽果,快過上年嘅自己,但又慢過理想嘅自己,究竟理想同現實點平衡,過程同結果又點分輕重呢?我只係知道,喺呢一剎那,我係想再跑嘅。

KEYMAN
節目主持
電郵:mailto:keymansoho@gmail.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載