蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年12月27日
馬上成為壹會員

體壇拾趣:萌爆劉靈玲「彈」起
何雯娜大戰新女神

何雯娜(右二)同劉靈玲(右)喺世錦賽一齊攞團體金牌。互聯網

中國嘅「彈網女神」、26歲嘅何雯娜自出道以嚟,一直都係公認嘅靚女;但係強國成13億人口,又點只何雯娜一個靚嘅彈網選手呢?最近,中國彈網隊又有個靚女成功上位,佢就係喺今年世錦賽贏到女子個人彈網亞軍嘅劉靈玲,就連《新浪》都特登同佢做咗個專訪。

幾年前,劉靈玲仲係個稚氣未脫嘅細路,企喺何雯娜隔籬都仲係毫不顯眼;但係估唔到𠵱家21歲嘅劉靈玲已經搖身一變,成為新一代嘅「彈網女神」,簡直全身都散發住一股仙氣。對於自己嘅外貌,劉靈玲都不知幾有自信,佢話:「其實我都冇特別注意人哋點讚我㗎,不過我一直都覺得我專揀老竇同阿媽嘅優點遺傳。其實我都好貪靚,所以我對自己個樣都幾有自信嘅。」不過唔知係咪察覺到自己係以彈網選手嘅身份接受訪問,佢之後即刻加番句:「不過作為一個運動員,我都係希望大家關注我嘅實力多啲。」
大家咪以為劉靈玲淨係得個樣,其實佢嘅彈網技術都唔差。佢喺2002年先開始接觸彈網呢項運動,但係2009年就可以躋身國家隊,真係冇番咁上下實力都做唔到。雖然佢今年喺世錦賽贏到女子個人彈網亞軍,但係大家都唔好以為下年里約奧運實會見到呢位靚女呀,因為中國隊內部競爭好激烈,稍為鬆懈就可能會冇咗奧運嘅參賽資格。面對冠軍級前輩李丹同何雯娜嘅競爭,劉靈玲都未驚過:「我覺得競爭可以令我進步。比起其他隊員,我嘅大賽經驗梗係唔夠啦,但我勝在夠後生、有衝勁。我會喺未來嘅訓練更加努力,希望可以表現得好啲。」當然,劉靈玲嘅目標唔只係拎到奧運嘅入場券啦,佢已經放下狠話要贏冠軍!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載