› 選擇地區
三藩市
紐約
洛杉磯
其他美國地區
香港 台灣 北美
 
2016年01月03日

趣趣地︰Po錯美斯囝囝相
拉莫斯「關公災難」

美斯女友安東莉娜生仔,竟然係沙治奧拉莫斯舊年值得回顧嘅大事!唔知美斯聽到呢個消息,會唔會突然覺得頭頂一片綠呢?皇馬隊長拉莫斯喺社交網站發佈一張組圖,入面有拉莫斯舊年值得回顧嘅重要時刻,例如佢同成班隊友慶祝、同皇馬續約、同隊友馬些路攬埋一嚿hehe咁,但最令人關心嘅係組圖入面正中間嗰一張(紅圈示)。

幾個鐘後發現出錯刪相

張相係一隻BB手捉住大人手,起初以為係拉莫斯舊年慶祝自己第二個仔出世嘅相,但有眼利嘅網民發現,呢張相係美斯女友安東莉娜舊年生完第二胎後,喺網上宣佈消息嘅相。件事立即變咗做網民熱話,好多人留言寸拉莫斯,而美斯就無辜中槍!有人話:「點解美斯女友生仔係拉莫斯嘅重要時刻?」嘩,即刻令人有好多聯想喎,唔通佢個仔嘅老竇其實係……亦有網民講笑話,呢個係拉莫斯擾敵之計,目的要搞到美斯分心;仲有唔明,點解拉莫斯手機會收埋啲同美斯有關嘅相。呢個post紅爆網絡,變成「關公災難」,過咗幾個鐘後,拉莫斯先發覺出錯相,刪咗張舊圖,重新上載過張新嘅。拉莫斯,下次小心啲嘞!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載