› 選擇地區
三藩市
紐約
洛杉磯
其他美國地區
香港 台灣 北美
 
2016年01月03日

體壇拾趣:楊格除潮鞋都係渣

正所謂「屎波架生多」,湖人喺NBA元旦日主場對東岸包尾嘅76人,後備射手尼克楊格(Nick Young)諗住贏硬,着對「三間」潮鞋落場(左圖),仲寸「三間」嘅商業對手「一剔」新年前已經收檔;湖人雖然贏93:84,不過楊格只拎得八分,下半場仲要換番對正規籃球鞋比賽㖭(右圖)。

其實楊格12月中已經着對炒價達兩萬蚊嘅卡其色版Yeezy Boost 750潮鞋對火箭,喺元旦日主場出擊就着咗對正價3,500蚊、一出就被秒殺嘅黑色版比賽,對鞋炒價𠵱家去到萬五蚊㗎。呢對潮鞋嘅設計師兼歌手Kanye West,就出咗首新歌《Facts (Explicit)》唱衰「一剔」,歌詞話佢哋對員工好似奴隸咁,畀勒邦占士啲錢唔好走數咁話;而楊格仲有樣學樣,喺twitter話「一剔」新年前已死。
不過,潮鞋始終係潮鞋,落場打波就真係爭啲,楊格上半場着住潮鞋,四射只得一中拎三分,下半場換番籃球鞋比賽,叫做好啲,埋單全場貢獻八分同四個偷波。湖人贏波功臣就梗係唔係佢啦,拜恩(Kobe Bryant)今仗因傷缺陣,得分後衞L威廉士(Lou Williams)拎24分,幫湖人贏九分,攞到今季第七場勝仗,而76人繼續以三勝32負排聯盟包尾。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載