蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年01月07日
馬上成為壹會員

咖喱牛腩:熱刺後防脫胎換骨 - 咖喱

講到今季英超進步最大嘅球隊,就肯定係李斯特城;但熱刺今季嘅防線亦令人刮目相看,睇得出領隊普捷天奴舊年暑假擺咗好多心機去建立球隊嘅防守體系,加埋新加盟嘅艾達韋列特(左)亦一柱擎天,堵塞熱刺後防漏洞。
上季熱刺後防真係得人驚,班後衞輪流派膠,聯賽總共失咗53球,係一支防守得下游水準嘅上游球隊。如果唔係有哈利卡尼喺前面狂入波,以攻代守,相信熱刺冇可能排到第五位。今年,熱刺後防脫胎換骨,踢咗20場失16球,係英超防守最好嘅球隊。由上季場均失1.4球,到今季場均失0.8球,熱刺後防進步真係好大,其中一大原因係幫維頓漢搵到個好拍檔。上季,維頓漢啲拍檔真係好似星期美點咁,有卡保奧、基利捷斯同法斯奧,但個個都係炸彈人,今季熱刺買咗艾達韋列特返嚟,長期穩定拍住維頓漢,呢兩個比利時同鄉亦好有默契,上季啲令人哭笑不得嘅甩漏場面少咗好多,門將洛里斯亦少咗表演機會。
除咗中堅之外,一對防中亦抵讚,上季,普捷天奴鍾意用賓達納同賴恩美臣,但呢兩位年輕球員防守力麻麻,其中賓達納真係攻強守弱,唔似係防中材料。今季普捷天奴就直情將賓達納同賴恩美臣打入冷宮,將中堅出身嘅艾歷迪亞改造成防中,拍住19歲嘅迪利阿里。連續兩年試用唔同小將踢防中,普捷天奴真係好敢用年輕人。如果熱刺用迪利阿里同艾歷迪亞踢防中,攻中用迪比利係一個幾好嘅配搭,迪比利嘅經驗可以幫到兩個後生仔。
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載