蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年01月07日
馬上成為壹會員

咖喱牛腩:孫興民醒過富二代 - 牽牛

上周六英超未開波,轉台睇吓港台節目,睇吓繼荷蘭叻後又有邊個上去獻醜,今次竟然係一班港女;講真為錢跳槽冇咩問題,好多球員轉會都係為咗加人工,修咸頓中場沙迪奧文尼講明曼聯出得起12.5萬鎊周薪就跳槽,文尼就唔會儍到講雲高爾對眼好靚好迷人,又唔會話傑斯個package好。
講package,熱刺翼鋒孫興民(圖)認真麻麻,一貫南韓人嘅眼細細,冇「劉仔」咁迷人,講落都有幾份似敗於劉仔手下嘅游學修。孫興民又唔係咩富二代,老竇只不過撈唔掂兼過氣球員,搞吓地區青年隊,自家土法煉鋼咁將個仔培養成一代球星。不過咁,港女們就算好有投資眼光,喺孫興民未成名已經賞識佢都冇用,𠵱家貴為亞洲最高身價球星,佢就梗係食咗,呀唔係,係識咗唔少南韓天團索女,𠵱家女友就係After School前成員劉小英。
小弟由季初已經講,熱刺係阿仙奴爭入前四最大對手,𠵱家佢哋排緊第四,力壓住曼聯,一啲都唔失禮。過去熱刺轉會市場操作都幾失敗,可以高價賣走球星,貝碧托夫、莫迪歷、加里夫巴利,都幫球隊執唔少,但冤枉嚟瘟疫去,過去買唔少水貨補充,2,200萬鎊買孫興民係唔係水貨?暫時都好難講,事關佢加盟後都傷過唔少時間,始終狀態未起番晒,暫時都係正選與後備之間,領隊普捷天奴仲猶豫緊叫佢打左翼定後上前鋒好,始終熱刺中前場都好夠人,競爭都好大,希望孫興民唔好因為適應問題而影響狀態啦。
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載