蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年01月07日
馬上成為壹會員

求驗客手記:賤價炒 冇人送
肥賓獨憔悴

皇家馬德里變天,喺周一突然炒咗上任只得半季嘅賓尼迪斯,由名宿施丹接任。施丹踢波咁叻,教頂級球隊效果係點,即刻成為熱烈討論話題;可憐嘅係連皇馬球員都已經當賓尼迪斯透明,話就話係肥賓選擇自己靜靜離開,但班球員連喺社交網留句言送行都冇,認真涼薄。

相關新聞:求驗客手記:施丹二仔有望上位

離隊聲明大方祝福皇馬

想當日,喺今季季前皇馬炒安察洛堤嗰陣,唔少球員都公開表達對安帥離開嘅不捨,基斯坦奴朗拿度(C朗)、沙治奧拉莫斯同埋加里夫巴利等一班球星,都喺各自嘅社交網站度同肥安道別。今次到賓尼迪斯被炒,佢本人決定唔返皇馬訓練基地同職球員親口講拜拜,亦唔會召開記招,只係發個聲明就算數;但係班球員完全冇喺其他途徑對肥賓作出任何表示,多少都反映出佢哋私底下都唔多鍾意肥賓,想佢走人好耐。
肥賓近年喺國際米蘭同車路士都係教短短日子就走人,今次離開皇馬應該都唔係太難接受,所以冇得撈後發佈嘅聲明都係客客氣氣,好嚟好去。球員時代喺皇馬出身嘅肥賓,喺告別聲明度提及:「實在好榮幸可以做皇馬教練,呢度係我成長嘅地方,亦都係我教練生涯嘅起點。作為嚟自馬德里嘅皇馬球迷,可以有一個為球會服務嘅機會,實在係好難得。我亦祝福施丹,我嘅繼任人,祝佢同埋教練團隊會成功,亦祝所有皇馬職球員好運,HALA MADRID(加油馬德里)!」
肥賓喺10/11球季接任國際米蘭主帥,教咗半季就因為得罪晒班球員同球會高層被炒,當時係佢麾下嘅前意大利國腳馬特拉斯,走出嚟踩多腳話佢重覆犯下人際關係差嘅錯:「你可能係全世界最叻嘅人,但喺一隊波你同球員唔能夠好好溝通嘅話,你乜都做唔到,但我睇賓尼迪斯永遠都唔會改佢嘅作風。」

15號前炒人只賠2,500萬

雖然肥賓喺上年夏天加盟皇馬簽咗三年約,每季除稅後人工300萬歐元(約2,500萬港元),但佢今次被炒未必收得足剩番兩年半嘅人工。因為有報道指,肥賓同皇馬嘅合約有一項條款,指明如果球會喺今個月15號之前炒佢,只需要賠番今季剩番嘅人工就得,即係大約150萬歐元。如果屬實,就唔怪得球會炒佢炒得咁突然。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載