› 選擇地區
三藩市
紐約
洛杉磯
其他美國地區
香港 台灣 北美
 
2016年01月10日

體壇拾趣︰居里戴Pad大殺三「荒」

咖喱仔(左)今場突然美斯上身,仲戴晒護脛落場比賽。美聯社

上周五舉行嘅NBA常規賽,最近飽受腳傷困擾嘅勇士當家球星「咖喱仔」史堤芬居里(Stephen Curry)突然美斯上身,除咗用美斯嘅思維去應付比賽之餘,為咗保護脛骨仲戴埋足球護脛(小圖)上陣;最終幫勇士大勝拓荒者128:108,戰績刷新至34勝兩負。

雖然主隊嘅尼拉特(Damian Lillard)今場拎到「雙雙」40分10助攻,但咖喱仔依然都係焦點所在;原本勇士隊醫就話咖喱仔嘅脛骨傷勢要四周先會痊癒,但係咖喱仔又點會願意唞咁耐?佢為咗避免再次受傷,仲決定戴護脛上陣:「我會不斷試新嘢,直到有效為止。」

居里:當美斯咁打

咖喱仔最近不斷同足球扯上關係,佢似乎覺得自己同金球獎得主大熱美斯有唔少相似之處,佢表示:「我覺得我同美斯都係創造力豐富嘅球員。我勁鍾意睇佢踢波,係佢嘅狂熱粉絲。」佢喺賽前已經揚言要用美斯嘅思維去比賽,最終佢攻入26分又交出九個助攻,其中一球仲係no-look妙傳畀保格(Andrew Bogut)「拆你屋」,望落都有幾分美斯嘅影子。不過問到佢會唔會轉行踢波,佢就好堅決咁話唔會喇。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載