› 選擇地區
三藩市
紐約
洛杉磯
其他美國地區
香港 台灣 北美
 
2016年01月10日

趣趣地:金球獎no show拜仁夠寸

哥迪奧拿(右)身在卡塔爾領拜仁操練,頒獎禮都唔去。

好似香港嘅音樂頒獎禮咁,唔出席嘅歌手多數都冇大獎,德甲冠軍拜仁慕尼黑,可能心知周一喺瑞士蘇黎世舉行嘅國際足協頒獎禮,要拎大獎嘅機會唔太高,就決定全體職球員繼續留喺中東集訓,只係派球會大使畢列拿去充撐場面。
其實拜仁都唔係話完全陪跑,好似哥迪奧拿都入到最佳教練最後三強,最佳11人方面,門將紐亞當選嘅機會都好高,不過今次幾乎全體缺席,唔知會唔會得罪「方丈」國際足協呢?
至於金球獎,由美斯重奪嘅呼聲就高唱入雲,但網絡世界就唔係咁睇,據fb作出嘅調查,竟然有36%球迷認為基斯坦奴朗拿度(C朗)可以拎金球獎,而美斯嘅巴塞隊友尼馬,就以24%排第二,相反美斯只排第三位。另外,阿仙奴中場奧斯爾,就喺球會twitter回答球迷問題,當有球迷問佢覺得C朗定美斯拎金球獎嗰陣,奧斯爾就好搞笑咁答係槍手防中法米尼,真玩嘢。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載