› 選擇地區
三藩市
紐約
洛杉磯
其他美國地區
香港 台灣 北美
 
2016年01月11日

求驗客手記:
瞞妻與𡃁模開房 馬迪爾被爆出軌

曼聯今個月二號喺英超以2:1擊退史雲斯後,向來形象健康嘅20歲法國新星馬迪爾同領隊雲高爾攞咗兩日假,借返巴黎探親戚朋友為名,掉低老婆莎曼花同五個月大嘅囡囡喺英國,同個叫愛美莉(Emily Wademan)嘅24歲英國𡃁模暗交,點知被對方爆大鑊,今次真係水洗都唔清嘞。

曼聯悶波險勝錫菲聯

前晚英足盃第三圈,曼聯靠朗尼完場前入12碼,主場贏甲組錫菲聯1:0,但又踢悶波,所以俾名宿史高斯狂插佢哋領隊悶、球員悶同埋球迷悶。悶都冇所謂,最大鑊係20歲新星馬迪爾因為出軌事件上頭條。學黃子華話齋,「若要人不知,唔好太低B」。英國𡃁模愛美莉就向傳媒爆馬迪爾呃老婆,仲有圖有真相,攞出佢哋嘅自拍照嚟力證馬迪爾係賤男。愛美莉同英國《太陽報》話:「馬迪爾同我有個浪漫時刻,但佢家陣返咗老婆同個女身邊。」愛美莉仲話佢哋透過社交網站認識,仲要係馬迪爾做主動;而佢事前都知馬迪爾係英超球星,而且知佢結咗婚,但馬迪爾就堅稱同老婆分開咗。

「佢傳短訊教我點去酒店」

去夏由摩納哥以3,600萬鎊轉投曼聯、周薪達九萬鎊嘅馬迪爾食女都算落足本,除咗出600鎊畀愛美莉坐法航去巴黎,仲揀間每晚要250鎊嘅五星級酒店嚟開心。愛美莉繼續話:「佢傳短訊教我點去酒店。我同佢講我唔係咁隨便嘅女仔,於是提議出去行吓先。我哋行街時有粉絲認得佢,雖然我哋冇拖手,但佢唔介意其他人見到我哋一齊。」
愛美莉又話返酒店前,馬迪爾帶佢去高級餐廳食飯。第二日馬迪爾自己留喺酒店,佢就去行街,仲買咗馬卡龍返酒店畀馬迪爾食。但佢話當馬迪爾知道佢買咗面霜畀個男性朋友時,馬迪爾有啲呷醋。返到英國後,佢覺得馬迪爾開始疏遠佢,而且見到馬迪爾老婆莎曼花上載佢哋一家嘅聖誕相,於是質問馬迪爾,但馬迪爾仲堅稱自己單身。
馬迪爾喺前晚場英足盃正選兼打足,但家陣俾人篤爆背妻偷食,肯定有手尾跟。消息指,曼聯、法國國家隊,同埋馬迪爾主要贊助商Nike同Foot Locker都好唔滿意,特別係法國,皆因佢哋先後爆出賓施馬用性愛影片勒索隊友華布拿,以及列貝利嫖妓走數,所以主帥迪甘斯對旗下球員嘅場外紀律執得好嚴,今次睇怕都會捉馬迪爾去照肺。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載