› 選擇地區
三藩市
紐約
洛杉磯
其他美國地區
香港 台灣 北美
 
2016年01月11日

求驗客手記:
搞嘢英足盃 冇直播可惜

禾確特(左)同球迷慶祝後,仲送埋自己件波衫畀佢㖭!
互聯網/路透社

上周六嘅英足盃第三圈賽事喺香港冇直播,但其實當中有唔少過癮鏡頭,以阿仙奴3:1反勝新特蘭嗰場為例,兵工廠前鋒禾確特就喺賽後搵咗個幸運廠迷出嚟,一齊大玩跳起撞籮柚慶祝。雖然嗰位球迷俾禾仔撞到跌咗喺地上,但之後收到禾仔嘅戰衣,真係乜都抵番。至於阿仙奴中場奧斯爾就做咗網絡紅人,皆因佢喺賽前就捕獲到國際足協會長候選人之一嘅約旦王子阿里合照,仲放埋上twitter度。另外,又有廠迷喺自己婚禮當日,致辭向奧斯爾致敬,奧斯爾亦好識做咁請嗰位球迷嚟睇波。

除咗阿仙奴場波,愛華頓贏杜根咸2:0場波亦有搞笑嘢,就係比賽期間突然走咗隻貓入場,仲要勞煩到「拖肥糖」門將祖爾盧保斯去捉貓,但始終都係捉唔到,俾佢走咗。至於阿士東維拉作客韋甘比嘅賽事,就出現不愉快場面。喺英超包尾嘅維拉對住乙組仔韋甘比,竟然只係打和1:1,後衞米卡李察士仲同嚟捧場嘅維拉球迷嘈,喺賽後,維拉全隊更加要喺警察護送下先可以上隊巴離開㖭!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載