› 選擇地區
三藩市
紐約
洛杉磯
其他美國地區
香港 台灣 北美
 
2016年01月15日

求驗客手記︰壓哨逼和兵工廠3:3
紅軍「雪人」振軍心

祖阿倫(左一)後備入替有貨交,入波為紅軍保住一分。路透社

周三英超利物浦同阿仙奴喺雪雨飄搖下合演精采大戰。領隊高路普首次喺英超同兵工廠主帥雲格交手,用人變陣唔差得過教授,由羅拔圖法明奴同祖阿倫「雪中送炭」,靠兩位「雪人」嘅入球,喺主場以3:3逼和對手。紅軍喺下周日雙紅會主場迎戰曼聯,加強唔少信心。

高帥調動見效狂跑慶祝

今場波有特別嘉賓嚟捧場,最近被皇馬炒魷嘅舊帥賓尼迪斯嚟咗睇波。利物浦最近戰績唔係太穩定,高路普喺今場波再執一執陣容,將表現一般嘅賓迪基收埋,由法明奴掛帥,呢位巴西鋒將喺今仗賽前只係喺英超入過一球,但一被委以重任即刻有料到,開賽10分鐘就先開紀錄;阿仙奴好快由艾朗藍斯扳平,但法明奴到19分鐘喺禁區外射入靚波,紅軍領先2:1。法明奴首次喺英超梅開二度,之後輪到阿仙奴前鋒基奧特發威,佢喺25同55分鐘各入一球令阿仙奴首度領先。
高路普喺法定時間剩番幾分鐘換入不受重用嘅中場祖阿倫,被雪到凍嘅佢喺90分鐘接應賓迪基頭槌二傳射門破網,高帥自然又嚟激情狂跑慶祝。各入三球和局收場,阿仙奴被同日贏波嘅李斯特城追到同分,靠較佳得失球仲坐住喺榜首。領隊雲格喺賽後確定,已經由巴素利簽咗中場艾連尼。
窮則變、變則通,利物浦近期聯賽用賓迪基踢正選,表現認真麻麻。高路普今場波實行以快打快,法明奴配合佐敦伊比同拉爾拉拿,喺阿仙奴未製造到射門之前就已經領先。今季經常提早被換走嘅法明奴,喺上半場仲有一次射門中楣,幾乎連中三元。

雲高爾嬲豬鬧記者肥佬

高路普上任後,紅軍先後贏過車路士同曼城,今場再賽和榜首阿仙奴,為下周日迎戰曼聯提高咗唔少信心。高帥賽後話:「呢場波實在精采,不過大家未必會討論太耐,因為下周日會有對曼聯呢場大戰。我哋開局踢得好好,但防守死球仲要改善吓,我覺得和波算係合理賽果。」
大家都係3:3,但佢哋喺下周日雙紅會嘅對手曼聯,周二被紐卡素逼和,繼續受盡批評,領隊雲高爾喺賽後記招被問朗尼狀態唔掂嘅問題,氣沖沖離場再轉身指住個記者話對方係肥佬,唔知會唔會有手尾跟。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載