› 選擇地區
三藩市
紐約
洛杉磯
其他美國地區
香港 台灣 北美
 
2016年01月20日

體壇拾趣:南華北上輸波贏知名度

成為南華亞協四名援將之一嘅賴恩格菲斯(左二),面對魯能強攻時亦要回防助守。

南華噚日喺廣州同中超勁旅山東魯能踢咗場友誼賽,結果「少林寺」喺陳偉豪、保贊同陳肇麒等主力冇隨隊下,以0:1不敵對手。賽後足主張廣勇正式確認,菲力斯保耶、艾華、保贊同埋賴恩格菲斯將會以外援身份出戰亞協盃。對於南華派唔派兵踢賀歲盃,張廣勇話由球員自己決定喎。

球員自行決定踢賀歲盃與否

南華對魯能一開波就俾對方牽住嚟打,不過一班少林兵守得好好,令控制大局嘅魯能冇乜威脅埋門,半場互無紀錄。
下半場一開波,魯能就靠後備入替嘅巴西國腳迪亞高泰迪利頭槌打破缺口。雖然南華之後繼續受壓,但冇再失波,面對攻力強勁嘅魯能以0:1僅負。中場卡路士比賽期間手背被踩,送院檢查後證實冇乜事,可以隨隊返港。值得一提係,有球迷特登帶賴恩格菲斯嘅簽名國安波衫,由北京去到廣州捧場,認真die hard!
賽後南華足主張廣勇話,球員表現好好,唔喺full team之下有咁嘅表現絕對收貨。今場波國內有網台直播,負責人話高峯期有12萬人睇,家陣成個山東都識南華。張廣勇覺得今次北上好值得,因為提高咗南華知名度,嚟緊仲有機會同廣州恒大友賽,到時成效更大。
另外,因為有部份南華球員喺農曆新年申請咗放假,所以對派唔派兵參戰賀歲盃,張廣勇話踢唔踢一切睇球員意願。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載