› 選擇地區
三藩市
紐約
洛杉磯
其他美國地區
香港 台灣 北美
 
2016年01月20日

求驗客手記:油價大跌
兵車老細輸入肉

油價跌到阿媽都唔認得,搞到我求大俠都損手爛腳,但同車路士班主阿巴莫域治(阿巴)及阿仙奴第二大股東烏斯曼諾夫比,絕對係蚊髀同牛髀,皆因由2016年年頭到𠵱家,阿巴同烏斯曼諾夫兩個加埋經已唔見咗超過17億鎊(約190億港元),呢嚿錢夠買今屆世界金球獎冠亞季軍美斯、基斯坦奴朗拿度同尼馬。

兩人加埋唔見二百億

啲油價好似食咗瀉藥咁日日跌,搞到本身係俄羅斯油王嘅阿巴莫域治同烏斯曼諾夫就日日跌錢。英國《電訊報》日前報道,估計有60億鎊身家嘅阿巴,私人唔見咗8.2億鎊;至於係阿仙奴第二大股東嘅烏斯曼諾夫仲傷,估計唔見咗9.1億鎊,身家或跌至100億鎊。如果由今年元旦日開始計,呢兩位俄羅斯億萬富豪因油價大跌而唔見咗17.3億鎊。雖則烏斯曼諾夫傷過阿巴,不過至低限度阿仙奴今季喺英超打得好,家陣排緊榜首,好有機會贏到自2004年後首個聯賽錦標,唔學似車路士咁排下游,爭標無望之餘,連爭入前四都好危。

打吡前夕主將齊復出

喺嚟緊嘅星期日,阿仙奴同車路士會喺英超碰頭兼合演倫敦打吡,烏斯曼諾夫同阿巴錢經已跌咗,當然唔想連聯賽呢三分都跌埋,所以阿仙奴同車仔班球員應該識做,傾盡全力幫老闆攞番個彩。賽前阿仙奴就收到好消息,雖則陣中幾位中前場球員包括路斯基、韋碧克、高基連同埋韋舒亞要到下個月先可以全面復操,不過奧斯爾同埋阿歷斯山齊士可望傷癒復出對車仔;如果奧斯爾落場,仲有可能着對新嘅三間全綠冇鞋帶波砵嚟比賽。今季聯賽有16次助攻嘅奧斯爾仲大讚呢對新砵,話可以令佢喺傳送方面發揮得更好。
阿仙奴或有兩大進攻主力復出,車仔方面亦可能有夏薩特復出,但夏薩特今季嘅跌幅勁過油價,聯賽只入一球兼只係得兩次助攻;就算車仔改以軒迪克代替盛傳同佢唔妥嘅摩連奴嚟執教,佢仍然係好沉,踢唔番上季贏英格蘭球員同足球先生嘅水準,所以傷癒復出對車仔嚟講,未必係好事。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載