› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

求驗客手記:射贏12碼闖英聯盃決賽
高路普變紅軍吉祥物

高路普一嚟到就幫利物浦入英聯盃決賽!利物浦前晚喺英聯盃四強次回合,主場輸畀史篤城0:1,加時後踢成1:1,好彩憑米洛列特喺互射12碼神救兩球,最終贏6:5,率先晉身下月28號喺溫布萊舉行嘅決賽。

史篤城靠越位波追和

利物浦首回合由佐敦伊比奠勝作客贏史篤城1:0,周二返到主場踢次回合諗住易踢啲,點知完半場前就畀阿拿奧杜域射入而落後0:1,兩回合打成1:1;但從電視重播所見,阿拿奧杜域入波前明顯越位成兩個身位。法定時間打和1:1,加時又冇入波,結果要互射12碼。頭五輪史篤城同利物浦喺第二輪分別有高治同安利簡恩射失,打和4:4,進入突然死亡階段;去到第七輪,米洛列特撲出蒙沙尼嘅12碼,祖阿倫就射入,最後利物浦12碼贏6:5,總比數以7:6殺入決賽。
射到第七輪先分勝負,真係好刺激,不過高路普就話自己睇唔到。呢個身高1米93嘅德國領隊表示:「通常我都會睇,但前排球迷話我太高阻住佢哋視線,我膝頭又有事唔可以踎喺場邊,於是坐喺後備席睇唔到囉。」話時話,利記17次喺具競賽意義賽事射贏咗14次,果然係12碼專家。

「紅軍卡富」踢足105分鐘

高路普又大讚養傷20個月後首次打正選嘅「紅軍卡富」法拿根:「法拿根係我嘅MOTM(最佳球員)。佢對上一次打正選係2014年五月,今仗佢打咗105分鐘,實在令人難以置信,真係好勁。」對於救咗兩球12碼嘅米洛列特同射致勝12碼嘅祖阿倫,佢咁講:「我哋決定咗頭五輪邊個射,但深信祖阿倫要有份射;結果佢亦幫我哋奠勝。另外,我真係一球12碼都睇唔到,不過米洛列特真係好出色。」提到有冇信心贏英聯盃,高路普就話:「我哋去溫布萊係要贏波,輸波好無癮㗎。」
今次係高路普執教生涯連續五季帶領球隊打入盃賽決賽,但之前四次只係攞到一冠,希望佢可以順利贏到喺利物浦首個錦標啦,同埋幫紅軍贏到自2012年後首個冠軍。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載