› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

咖喱牛腩:《怎麼才算贏巴塞?》 - 牽牛

寧得罪拉登,莫得罪高登;早幾日香港面對超級寒流,最引人發笑嘅新聞一定係港女硬闖大帽山頂,同負責封山嘅警察大聲講:「條命係我哋自己㗎嘛、救人係你哋嘅職責」,結果當然順利被高登仔起晒底。樹大招風,巴塞隆拿都有高登潮文《怎麼才算贏巴塞?》,包括不能鏟美斯、不能打鐵桶陣等等,其中一項係「對巴塞時必須全隊都是青訓球員,否則只是靠錢換來成功」。
坦白講,巴塞青訓基地拉馬西亞曾經係無數球星搖籃,亦係巴塞引以為傲嘅地方,美斯、沙維、恩尼斯達、碧基等等都出身球隊青訓系統,2011年巴塞更曾排出青訓正選11人應戰,成為一時佳話。但急於求成又好,青訓球員未能接班又好,巴塞已行番收購貴價球星舊路,前線MSN組合,蘇亞雷斯同埋尼馬都係巴塞天價收購,仲有拿傑迪錫呢啲身價唔平嘅中後場球員,一月開始可以正式上陣嘅阿歷斯維度同埋阿達杜倫,亦屬貴價兵。
相反90後嘅巴塞青訓產品,𠵱家只可以喺球隊副選夾縫中出現,甚至好多已經流落英超、葡超等球隊;愛華頓就要多謝巴塞放棄迪路菲奧,法比加斯回流英超,好歹都幫過車路士贏聯賽冠軍。其實最可惜嘅係中場拉芬拿艾簡達拿,個人天份唔差過阿哥堤亞高,不過就成日受傷。巴塞青訓最出名係打造翼鋒,能夠位列一隊,成為MSN身後「R1」及「R2」,蒙尼亞艾哈達迪(左)同辛度拉美利斯都係球會重點培訓,兩人身材、踢法相似,把握力以蒙尼亞較佳。其實自馬體會同皇馬失分,巴塞榜首優勢明顯,周六榜首大戰如果贏埋馬體會,冠軍已經係囊中物,餘下聯賽不妨多用蒙尼亞同辛度,先能夠傳承巴塞優良傳統。
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載