› 選擇地區
三藩市
紐約
洛杉磯
其他美國地區
香港 台灣 北美
 
2016年02月04日

求驗客手記:恒大蘇寧有排鬥
馬天尼斯3.6億做標王

中超土豪,沒有最豪,只有更豪!由許家印同馬雲話事嘅廣州恒大噚日宣佈,以4,200萬歐元(約3.6億港元)由王健林有份嘅馬德里體育會,簽入哥倫比亞國腳積臣馬天尼斯,打破江蘇蘇寧收購拉美利斯嘅紀錄,成為今個冬季轉會窗兼中超標王!
唔係馬後炮,我求大俠一直都唔信拉美利斯會做到冬季標王,因為中超最豪嘅恒大都未出手。果然,噚日朝一睇新聞,就見到恒大出招將風頭同標王搶返嚟!江蘇蘇寧用咗2,800萬歐元由車路士買拉美利斯?恒大就用多千幾萬,出4,200萬歐元買起積臣馬天尼斯!馬天尼斯唔單止係冬季標王,仲係中超史上最高身價嘅球員,呢次已經係恒大第四次刷新中超轉會費紀錄。

中超轉會窗開到26號

據報,上海申花等中超球會都向馬體會報過價,想大概用2,000萬歐元買入馬天尼斯,但都被拒絕。恒大為咗令馬體會放人,就出個double,搞到對方唔放人都對唔住自己荷包!西班牙《阿斯報》話,馬天尼斯其實想留隊,但馬體會為咗賺恒大呢筆,決定逼走佢,仲計劃用呢嚿錢買𠵱家踢緊車路士嘅迪亞高哥斯達回巢。
有樣嘢幾巧合,一年前嘅冬天,萬達集團老闆王健林用4,500萬歐元買起馬體會兩成股權,做咗第二大股東;一年後,許家印同馬雲嘅恒大就用咗4,200萬歐元去買一個馬體會後備前鋒。原來一個馬天尼斯就幾乎值五分一間馬體會,真係唔知話王健林買得平定許家印慧眼識英雄嘞。

未及歸隊難鬥南華

不過,馬天尼斯其實只係暫時嘅冬窗標王,因為中超轉會窗開到2月26號,同埋據報蘇寧打算用5,000萬歐元收購薩克達嘅阿歷士泰斯拿,若果事成就會破番恒大嘅紀錄。
29歲嘅馬天尼斯同恒大簽約四年,嚟緊會着九號球衣,九號就飛到杜拜會合球隊,參加季前集訓。至於港超球隊南華噚日就宣佈,周六下晝會同恒大喺佛山踢友賽,可惜嗰陣馬天尼斯未歸隊,保贊同陳偉豪呢對中堅無緣同馬天尼斯過招喇。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載