› 選擇地區
三藩市
紐約
洛杉磯
其他美國地區
香港 台灣 北美
 
2016年02月04日

咖喱牛腩:「哥女神」點先算成功 - 咖喱

前兩日同牽牛兄講起比歷連尼同哥迪奧拿(圖),發現比歷連尼就好似水泡咁,曼城三年前未媾到哥迪奧拿呢個女神,所以就搵佢嚟頂住檔、拍吓散拖先。雖然呢個愛的替身表現不過不失,但當曼城今年終於追到女神,當然即刻飛咗比帥啦。不過小弟身邊有唔少人都質疑哥迪奧拿並唔係教練界女神,佢只係一個好命港女!
有位朋友認為,哥迪奧拿之所以喺巴塞隆拿成功,全因為隊波本身勁,求其搵個人教都掂;至於哥迪奧拿喺德甲無敵,就因為拜仁慕尼黑本身超班,而哥帥帶唔到拜仁拎歐聯,就代表佢脫離巴塞體系就唔掂。
朋友嘅結論好簡單,哥帥成功係因為隊波勁,唔係教練勁。咁我問嗰位朋友:「你點先至覺得哥迪奧拿勁呢?」朋友就話:「教到英超中型班踢歐聯。」
呢種睇法喺前幾年都出現過,但主角係美斯,當時C朗以英超第一人身份過皇馬,每當爭論美斯定C朗勁啲嗰陣,一定有人用呢種論點去撐C朗,就係美斯都冇去過英超證明自己!估唔到,家陣就變成哥迪奧拿應該去英超中游先證明到自己。小弟心諗,點解哥迪奧拿要有豪門唔教而走去啲史篤城、水晶宮度教呢?不其然令我諗起讀書嗰陣打《FM》,帶曼聯拎冠軍係冇朋友會讚,但如果帶隊不知名球隊打上英超仲拎埋歐聯,就係最勁,因為難度高囉!
不過,現實唔同打機,打機game over咗可以重新開始,仲可以load save,但人生唔係,有得揀梗係揀最好。如果你本身喺牛津、劍橋教開,啲常春藤大學爭住請你,你會唔會話去國力書院證明自己呢?
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載