› 選擇地區
三藩市
紐約
洛杉磯
其他美國地區
香港 台灣 北美
 
2016年02月04日

咖喱牛腩:比帥過車仔復仇啦 - 牽牛

問責制,從來都只係喺西方國家存在,當起一條鐵路超支幾百億,擺明係一隻大白象,問責官員和稀泥咁hea答幾句,就一啲事都冇,反而最熱心希望問到底嘅議員,就被批評為搞事,拖垮香港經濟云云。最搞笑係呢幾日有單新聞,話裝修公司報大數,原本開價十幾萬,整吓整吓加到八十幾萬,業主不滿就去咗海關投訴,裝修公司老闆仲俾人拉埋㖭。講超支,高鐵開支多好多個零,海關又會唔會去政府拉人?
最新NBA同英超兩位上季嘅二奶教練都冇得撈,騎士就炒咗布拉特,曼城就宣佈定來季由哥迪奧拿接手,現任領隊比歷連尼(左)會離開。比歷連尼真係悲劇人物,2009/10年帶領皇家馬德里,拎到96分超高分排第二,輸畀更勁嘅巴塞隆拿,都要被炒。比帥喺曼城成就更高,贏過英超同英聯盃,𠵱家曼城都叫緊英超、歐聯、英足盃同英聯盃四飛。而且比帥處理更衣室問題一向都幾好,好少聽見球員對佢不滿,都算係爛好人。當然呢個世界,越好人就越俾人「蝦」。
先唔講曼城今次呢個「關公災難」,小弟唔知下半季比帥喺球隊仲有咩威信,如果曼城歐聯撞啱拜仁慕尼黑,藍月亮都唔知點處理。比歷連尼嘅去向較令小弟關心,智利工程師原本有大好機會回國,不過衰在國家隊搵到新教練;皇馬請施丹,唔會教得半季啩。有雄心嘅話,比帥不如向車路士自薦,講真車仔來季帥位傳到干地、艾基利之流,證明冇咩人想做,比帥忍耐力算強,如果可以搞番起車仔,甚至聯賽殺低哥迪奧拿嘅曼城,呢個復仇場面仲唔夠經典?
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載