蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年02月08日
馬上成為壹會員

間接畀貼士!
韋達棄質高新兵 揀黑衣巨人家族馬

過氣冠軍騎師韋達,雖未致被一沉百踩,但馬迷對佢騎功評價大降係事實。不過韋達用行動證明,佢仍有心有力,剛戰夥拍「天才」攻下百週年紀念銀瓶,賽後佢更透露,自己為咗騎「天才」,刻意捱餓減去近七磅,可見爭勝決心之大,呢類佢高度重視之馬,絕對係上佳捧場對象。
嚟緊初三賀歲賽,韋達有匹座騎一如「天才」,亦有動態顯示到重視程度,就係第十場三班1400米黑衣巨人「步步友」馬主李氏家族嘅「步步德」。
點解咁講呢?話說同場嘅「神威敖翔」,原本韋達成擔心機操,包辦該駒在港三次試閘,並取得兩冠一季,每次都後勁凌厲,狀態夠晒爭勝水準,此駒在新西蘭只4戰並係三級賽季軍,潛力十足;但到咗今次在港初出,韋達卻最終放棄「神威敖翔」而揀騎「步步德」,咁你話「步步德」係咪值得加倍重視先?
韋達咁做其實可理解,佢上次初騎「步步德」,即有唔錯表現,全程走勢輕鬆下取得一席殿軍,可以話已經試準,拼後仲要試過課大閘先再出,備戰有誠意,加埋今仗抽3檔好位,睇嚟韋達可以一如「天才」,又勝出漂亮一仗喇!

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載