› 選擇地區
三藩市
紐約
洛杉磯
其他美國地區
香港 台灣 北美
 
2016年03月13日

Sunday Fever:有乜嘢球迷就有乜嘢球隊 - 馬啟仁

全城水深火熱,足球原本係救星,可惜沒有一支永遠不倒的球隊,可以永遠畀你依靠。
每支勁旅代表一個時代,但都有賞味期限。80年代嘅利物浦絲絲入扣,千禧年代嘅阿仙奴水銀瀉地。而過去20年嘅曼聯就係簡單直接,戰意鮮明,呢個時代嘅曼聯畀我哋嘅印象好深刻,尤其是90年代開始香港每下愈況,人心動盪進退維谷,唔使驚,曼聯喺大廳,由簡東拿拔刀相助改邪歸正,碧咸橫空出世半場笠死,雙翼齊飛左右開弓,鋼門鐵閘乜都有齊,呢個時候嘅曼聯根本就係好多香港人嘅超級英雄。
一班又一班嘅紅衫英雄,陪我哋走過回歸收檔樓市跌盪沙士空巷,好似社會越沉曼聯就越勁,每日受埋咁多冤屈怨氣,夜晚就靠黑白雙煞一球一球安撫大家空虛嘅心情,望住個波,空洞嘅眼神都有番啲目標。今時今日香港低處未算低,但勁旅們都唔係幾掂,超人都自身難保之下,原本就係球迷自救嘅時候!可惜無論你捧邊隊,主流球迷入面有兩種瘀血,都係害人不淺,令人洩晒氣嘅。兩種瘀血,一種係債主球迷,一種係債仔球迷!
債主球迷,係贏少球都唔開心,輸波就係世界末日,彷彿球隊係欠咗佢,每場波都一定有黑手,每個球證都有陰謀,完場輸贏佢都會企起身拍手掌,但有啲似《少林足球》嘅強雄君臨天下咁嘅款。不過就算球隊打得幾好,佢永遠都係沉醉喺舊時嘅某一段日子,「當年嗰陣勁好多,𠵱家呢班差好遠囉。」係佢口頭蟬。
債仔球迷呢種瘀血係另一個極端,所有成績都唔係應份嘅,開波前永遠係打輸數,覺得自己隊波點都唔及其他嘅,一領先就唔敢睇,反而落後就好平常心,覺得應份。萬一隊波發揮出色,佢會好感恩,會喊,就係唔會慶祝。因為贏波就好似債主寬限幾日還錢咁,冇債仔係會因為咁而大呼大叫,最多鬆一口氣,跟住又愁過。
喺債仔球迷眼中最關心永遠係下一場,下一場佢哋總係傷兵多過人,唞得少過人,打定輸數。「畀多兩日我隊波籌旗啦大佬!」比賽日一到就好似債主又上門嘞。
隊波打成點我哋控制唔到,但我哋可以調校自己,唔做瘀血球迷。

KEYMAN
節目主持
電郵:mailto:keymansoho@gmail.com

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載