› 選擇地區
三藩市
紐約
洛杉磯
其他美國地區
香港 台灣 北美
 
2016年04月07日

咖喱牛腩:十年後的球壇 - 咖喱

《十年》預視10年後嘅香港,內容令人傷感,又觸目驚心;最終金像獎勇敢,給予最佳電影殊榮。咁10年後嘅球壇會變成點?小弟不才,雖然唔會估中,但都幻想吓10年後嘅事。
2026年嘅歐聯決賽,由沙維帶領嘅巴塞隆拿面對泰利嘅車路士,呢場係歐洲球壇兩大哲學火併之戰。以前喺哥迪奧拿領軍嘅年代,巴塞已經開始位置模糊化,而到沙維呢個年代,巴塞再冇分前、中、後,復興番告魯夫嘅全能足球。至於泰利嘅車仔就相反,固守陣式,每個球員都要嚴格遵守賽前部署,企啱晒位,每個球員之間嘅距離都係用人工智能計出嚟嘅。車仔足球總監摩連奴同巴塞副主席哥迪奧拿,一齊坐喺看台,睇佢哋嘅弟子點樣將自己嘅足球哲學再進一步發揮出嚟。鹿死誰手,真係好難估。
喺英國曼徹斯特,雲高爾銅像揭幕,2026年金球獎頭兩名嘅安東尼馬迪爾(左)同拉舒福特主持呢個儀式。雖然雲高爾帶曼聯嘅成績極差,但提拔咗兩個新人。喺佢離任後,馬迪爾同拉舒福特發光發熱,幫曼聯連贏三季英超,之後以破世界紀錄嘅三億鎊一齊轉投皇家馬德里。呢日,佢哋返到成名地曼聯,肯定雲高爾嘅成就,同埋好多魔迷都認錯,原來雲高爾罪在一時,但功在後世。
喺2026年嘅美國世盃決賽,德國靠穆罕默德入波贏咗巴西。前德國總理默克爾喺看台上喊出嚟,因為呢支德國大部份都係嚟自中東同北非嘅難民,而穆罕默德仲係敍利亞人。德國證明難民可以變有用之人,默克爾當年決定收容難民引起反彈,但回望過去,佢係做得啱嘅!
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載