› 選擇地區
三藩市
紐約
洛杉磯
其他美國地區
香港 台灣 北美
 
2016年04月10日

Sunday Fever:小學雞的小兒科往事 - 馬啟仁

每周追睇區樂文嘅文章,就好似飲得汽水多,有時都搵支甜味綠茶入吓口,唔激但淡淡地,有啲回甘味。尤其係佢啲故事簡單如小學生,但係呢,又仲係有啲唔大唔小嘅道理收埋響後面,要攞就攞,唔攞亦可。上星期區醫生寫咗幾件小時候開心事,文筆學你唔到,但係開心事應該唔會少過你啩。
四年班,放學流連足球場,睇住班校隊同學練波,着住對黑鞋同三、兩個被排擠嘅同學響隔籬籃球場踢網球,日日如是,直到有日校隊腳痕,撩場邊雜牌軍鬥波,我有份,仲有個咁蹺行過、左手攞住手提包嘅大叔加入。結果雜牌軍贏咗5:0,我人生第一次帽子戲法,亦暫時係最後一次;其實三球都係攞袋大叔扭入禁區送畀龍門口嘅我射入,雖然之後我都係冇得加入校隊,但我永遠感激嗰位貌似胡國雄嘅叔叔。
五年班,音樂堂,成班圍住Miss個鋼琴企,Miss彈音樂同學就跟住唱,唯獨我冇唱,只係掛住用手上嘅紙扇,跟住拍子打個琴,真係打到啪啪聲,但係Miss不但冇阻止我,仲響一曲已盡嘅時候同我講:拍得好!可惜之後成個中小學階段,都冇玩過任何樂器同參加過choir,天份可能就咁埋沒咗。
二、三年班,返學前最鍾意去爬附近個山,爬上去刺激,跣落嚟興奮,有次仲竟然爬爬吓執到錢,係100蚊,對當年小學雞嘅我嚟講,100蚊大概等於𠵱家100萬咁上下。嗰日初嘗富豪滋味,一落山就買漫畫食雪糕租單車,返到學校仲要大宴親朋請同學飲汽水,結果俾眼紅嘅人告狀,訓導主任懷疑我偷錢,記缺點一個,最慘嘅係佢沒收咗用剩嘅50幾蚊。
五年班,小息爭乒乓波枱打波,同隔籬班一人霸咗一半枱,各據一方之際,大家鬥召集同班同學,結果我班同學高大啲聲大啲,爭贏咗,但已經打鐘。心諗啲同學一call即到,自己都算幾受歡迎之際,有位扮晒浩南哥咁行埋嚟同我講:冇咁大個頭,唔好戴咁大頂帽呀!咩呀,當我係山雞呀?我個頭真係唔細!
往事仲有好多,但諗真啲,開心事原本都係衰嘢。

KEYMAN
節目主持

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載