› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

求驗客手記:逼和曼城 護級有望
肥賓向紅軍求分

紐卡素領隊賓尼迪斯上周六56歲生日,終於領喜鵲打開勝利之門,成個人自信心返晒嚟,周二英超快車面對前冠軍曼城都一樣毫無懼色,如果唔係曼城前鋒阿古路靠問題入球先開紀錄,攻入個人英超第100球,紐卡素贏波都有可能。點都好,紐卡素逼和1:1後,護級有番起色,下仗作客晏菲路,睇吓利物浦舊部幫唔幫到手嘞。
賓尼迪斯季初仲帶緊皇家馬德里時,傳出鐵腕治軍引起球員不滿,教唔夠半季就落台,但其實鐵漢都有柔情一面,好似紐卡素中場穆沙施素高個幾歲大嘅囝囝入場撐老竇場,唔識死坐咗賓帥個位,賓尼迪斯都冇發嬲,仲問施素高囝囝拎簽名㖭,最後施素高老婆急急抱走囝囝,賓帥先有位坐。

阿古路成英超效率王

我求大俠都唔係想成日鬧英超球證,不過繼上周李斯特城對韋斯咸嘅球證失控,呢場旁證都唔得掂。14分鐘高拉洛夫罰球傳中,阿古路接應下頭槌建功,曼城先開紀錄,但慢鏡睇阿古路起碼越幾個身位,但旁證一樣發雞盲。不過咁都好,阿古路射入咗佢英超第100球,係英超歷史第25人入球過百,雖然阿古路用147場比賽入100球,效率及唔上紐卡素名宿舒利亞嘅124場,但以分鐘計,平均107.5分鐘就入一球,效率就最高。

紅軍舊部爭四難畀面

上天都好公平,紐卡素喺努力之下,由安尼達31分鐘右路窄位施射中柱彈入,助球隊逼和曼城1:1,對護級好有幫助;雖然賽後紐卡素仍然以29分排尾二,落後17位諾域治兩分,但以兩場搶四分氣勢,成功上岸不是夢。不過周六紐卡素就要作客利物浦,賓尼迪斯對晏菲路球場應該都好熟悉,事關佢04至10年做紅軍領隊,贏過歐聯、英足盃等冠軍,但正所謂十年人事幾番新,紅軍現時得番盧卡斯、史卡迪爾同法拿根喺賓帥麾下效力過,利物浦本身都要爭前四,賓尼迪斯呢次領軍倒戈都應該唔易踢。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載