› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

咖喱牛腩:李城下季見真章 - 何西

何西又做替工,今次係頂替咖喱。英超李斯特城上場聯賽失分,同韋斯咸踢成2:2,熱刺乘勢大炒史篤城,贏波拉近距離,贏唔贏到英超冠軍似乎仲有價講。不過姑勿論李城最後可唔可以封王,呢隊波肯定已經成為十幾廿年後都仲有人津津樂道嘅傳奇球隊。
反而最令人擔心嘅係李城會唔會係one season wonder,下季有大把錢使,又要兼顧歐聯賽事,喺同今季完全唔同嘅環境下,班球員身心情況會唔會應付唔嚟呢?

兼顧歐聯考驗大

今季李城向世人證明咗,要贏英超冠軍,都唔一定要用幾億鎊去打造隊波,蔗渣嘅價錢一樣可以有燒鵝嘅味道。李城喺有限預算下,冇咁多嘢諗,但到下季先至考工夫;球會有咗英超獎金、水漲船高嘅電視轉播費,同埋出戰歐聯千萬鎊計嘅收入,要點樣發展先好呢。再去低組別球會搵下一個占美華迪?定係使大啲,羅致身價三幾千萬鎊嘅球星加盟?
近十幾年,歐洲球壇不時都有球隊突然彈起,但一去到第二季要兼顧歐聯就出事。英超最經典嘅有列斯聯,2004年降咗班之後,到𠵱家都未上返嚟。
西班牙就仲多,呢十幾年嚟,由踢歐聯到降班嘅球隊就有拉科魯尼亞、皇家蘇斯達、切爾達、貝迪斯同埋維拉利爾等等,如果應付唔到雙線發展,踢歐聯隨時變成催命符。
李城球員確係冇乜踢歐戰嘅經驗,好在主帥雲尼亞里(右)跑慣江湖,佢喺近30年執教生涯教過唔少勁旅,雖然都幾令人奇怪嘅係,佢竟然連一次頂級聯賽冠軍都未贏過,但始終領軍出戰歐洲盃賽經驗夠。
李城喺今個夏天除咗要留住占美華迪、馬列斯等等一班主力之外,同時都要記住唔好俾其他球會撬走主帥雲尼亞里呀。
文:何西

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載