› 選擇地區
三藩市
紐約
洛杉磯
其他美國地區
香港 台灣 北美
 
2016年04月21日

咖喱牛腩:球證隨時害死「李」 - 牽牛

關公呢排都好鬼忙,下季將會直播英超嘅樂視,國內分銷站竟然抽熊本地震水搞大特賣,連香港嘅面書專頁都要走出嚟道歉,不過講真,道歉聲明就冇咩誠意喇,主要都係話成件事係分銷站自把自為,同公司嘅立場冇關,劃清界線咁話。
其實呢間以國內資金為主嘅網絡電視,喺香港大展拳腳,買咗唔少體育直播權,英超未來三年都係佢哋播,但收費就比以往香港其他收費電視台平,仲搞好多促銷,簽一年約就送手機,三年約仲送埋電視㖭,真係幾令人心動。不過小弟深明邊有咁大隻蛤乸隨街跳嘅道理,𠵱家都係抱住觀望態度,睇下同事朋友裝完再出「包膠」之後,先至考慮裝唔裝。

英超窮得只有錢

講真,英超轉播費炒到天價咁高,普通一支中游球隊嘅收入,都可以多過歐聯冠軍份獎金,當然可以吸引更多球星加盟。但老生常談,英超硬件始終都未有太大改善,特別係執法方面,雖然加咗門線技術,處理爭議性入球多番少少權威性,但主宰比賽嘅球證,水準始終都冇咩提升。
周日英超又有爭議,李斯特城前鋒占美華迪喺韋斯咸禁區入面跌低,俾球證摩斯(右)認為係插水,結果搞到兩黃一紅被逐;球證之後越吹越亂,臨尾分別判李城同韋斯咸各一個12碼,都真係失晒控。小弟都曾經建議過英超搵外籍球證執法,但以佢哋咁保守,英國佬又咁自視過高,又點會咁輕易搵外援。
最後李城總算逼和2:2,拎番一分都好過冇,但占美華迪要停賽,對下仗鬥史雲斯影響都幾大。
講真李城今季個戰術都係簡單直接,華迪腳風順嗰陣當然入波易過食生菜,𠵱家靠後備前鋒荷西烏路亞,真係有啲令人擔心,如果李城最終真係崩盤,熱刺真係要多謝摩斯。
文:牽牛

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載