› 選擇地區
三藩市
紐約
洛杉磯
其他美國地區
香港 台灣 北美
 
2016年04月24日

求驗客手記:叫粉絲買定煙花慶祝
雲尼亞里忽然變囂

呢排名曲《side angle side》瘋狂洗版,真係少啲童真都頂唔順;講開童真,大家細細個一定聽過「龜兔賽跑」呢個故事,兔仔因為一時驕傲,大好形勢下都可以輸畀烏龜,李斯特城𠵱家英超領先熱刺五分,形勢仲係一片向好,領隊雲尼亞里就叫粉絲準備定煙花,咁驕傲又會唔會將大好江山葬送呢?

遭英欖教頭狠批高調

雲尼亞里64歲人,教練生涯都未贏過頂級聯賽冠軍,李斯特城今季一直創出神奇之旅,雲帥都保持低調,季中話以護級為目標,早一個月前話希望拎到歐聯資格,到今時今日剩番四輪聯賽都仲排榜首,亦都肯定獲得歐聯資格,雲帥終於開始囂張嘞。今日對史雲斯賽前,佢叫粉絲們可以準備定放煙花,等到季尾慶祝用,雲帥話球隊獲得下季歐聯資格後,𠵱家向未曾拎過嘅英超冠軍做好準備。
雲帥一改以往低調,連前英格蘭國家欖球隊教練活禾特都狠批,話佢今次犯上錯誤。活禾特話主帥唔可以喺未完成一場比賽前,就講下場比賽,甚至以後嘅準備,球員聽咗就會分心。講真,李城𠵱家仲有五分領先優勢喺手,但相比熱刺,李城餘下四場賽程就比較難啃(見附表),尤其要作客呢排好勇嘅曼聯,前鋒占美華迪能唔能夠刑滿復出都仲未知。

熱刺禁球員赴頒獎禮

龜兔賽跑入面,烏龜就冇理會自己大幅落後,繼續一步一步力追,仲趁驕傲嘅兔仔瞓覺反超先拎冠軍;熱刺做唔做到烏龜就未知,但領隊普捷天奴就肯定要求班球員龜縮先。英格蘭職業球員工會今日就舉行頒獎禮,前鋒哈利卡尼係球員先生熱門,20歲中場迪利阿里更加係最佳年輕球員大熱,不過普帥就勒令佢哋唔可以出席頒獎禮,留喺屋企準備周一主場對西布朗嘅比賽。普帥仲話周一贏波後,幫佢哋補開派對都冇問題,但𠵱家就要專心備戰。咁又難怪普帥咁緊張,因為據報如果熱刺拎到冠軍,普帥可獲50萬鎊(約550萬港元)額外獎金,名成利就有邊個領隊唔想。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載