› 選擇地區
三藩市
紐約
洛杉磯
其他美國地區
香港 台灣 北美
 
2016年04月28日

咖喱牛腩:托迪何不華麗轉身 - 何西

牽牛鍾意半夜追重播劇,唔知佢有冇連下晝嗰水都翻兜埋,日前見某大台翻做汪阿姐套戲,唔知啱唔啱佢胃口。阿姐啲戲就由細睇到大,但支持開意甲嘅球迷,可以一路陪佢哋成長嘅球員買少見少,羅馬老王子托迪由93年意甲初登場,一心一意想踢到終老,點知球會又唔多想同佢續約,何不嚟個「華麗轉身」,見好就收。
可以喺一間球會效力廿幾年,職業生涯從一而終實在唔容易,可能到今年九月就40歲嘅托迪(圖)都有呢份執念,到今季季尾約滿之後,都只係想同羅馬續約。不過羅馬球會方面唔知係咪覺得出份球員人工畀佢嘥米飯,成日想勸佢退休上神檯,喺球會撈番一官半職算數。如果冇球會高層撐腰,相信教練史巴列堤都唔敢咁明目張膽同托迪撐到行,唔用你就唔用你。
托迪被睇死偏偏就爭氣,近兩個星期喺有限上陣時間交足貨,作客阿特蘭大85分鐘入波3:3逼和對手;主場迎戰拖連奴喺完場前四分鐘兩次掂波就入兩球,幫羅馬神奇反勝3:2;到周一羅馬又係臨完場前入波,迎戰拿玻里都係要等到托迪入替之後先打破僵局,尼恩高蘭絕殺1:0嗰次進攻,托迪亦有份策動。近三場意甲,唔計補時,托迪加埋只係上陣咗25分鐘,就已經入咗三球;難怪日前又有消息話,球會開始考慮改變主意,畀份一年合約佢。
其實就算可以留多年,可以預計到托迪喺下季仍然會被投閒置散,唔會得到史巴列堤重用。以𠵱家意甲形勢嚟睇,羅馬可以威脅到祖雲達斯王者地位嘅機會亦唔大,托迪想臨收山贏多次意甲冠軍亦冇乜可能。有時候趁自己仲喺巔峯嗰陣退落嚟,可能好過俾人話你已經踢唔掂嘅時候先黯然告別。
文:何西

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載