› 選擇地區
三藩市
紐約
洛杉磯
其他美國地區
香港 台灣 北美
 
2016年04月28日

求驗客手記︰C朗缺陣 皇馬曼城交白卷
赫特鐵布衫搶鏡

周二歐聯四強首回合,皇家馬德里作客出戰曼城,賽前有消息話基斯坦奴朗拿度(C朗)會傷癒復出,點知返嚟曼徹斯特最後都係踢唔到。C朗no show,皇馬進攻威力即時差一截,加埋主隊呢邊有門將赫特連鐵布衫都出埋守住大門,兩隊最終0:0和局收場,下個禮拜喺巴拿比奴球場再鍊過。

自戀C朗型棍踩場

C朗因大腿受傷缺席咗上周六場西甲之後,話呢場波可以復出原來係煙幕,有消息話佢大腿肌肉有撕裂情況,隨時連下星期次回合都仲未踢到。C朗冇份踢,賽前就文裝一度踩吓場,戴埋耳筒又着住對自己品牌嘅鞋,相當有型;佢仲被影到手機係播緊影住自己啲片,嘩唔係自戀成咁嘛?
上場西甲皇馬冇C朗好在有加里夫巴利及時復出入兩球,有驚無險3:2反勝華歷簡奴;不過今次作客曼城,繼續孭飛嘅巴利,腳風就唔多順,有全場最多嘅五次攻門,但冇一次命中到目標,對主隊門將赫特冇乜威脅。不過曼城可以喺首回合力保不失,都係要靠赫特,喺比賽末段有兩次精采撲救。79分鐘,皇馬中場卡斯米路門前六碼頭槌攻門,咁近都被赫特用腳救出;三分鐘後皇馬再一次幾乎由角球建功,曼城中堅奧達文迪清唔晒個波,今次離門更近嘅比比一控再射,但赫特已經出咗嚟封位,撐開身體用腹部擋走射門,好似施展鐵布衫神功咁。

施丹又爆軚出醜

雙方最終互無紀錄,皇馬教練施丹賽後話都已經收貨:「對手好強,要贏實在唔容易,喺下半場我哋有較多機會,但把握唔到實在係有啲遺憾。C朗喺最後一課操練話有啲唔妥,我哋唔會冒任何風險。賓施馬喺比賽受傷(半場退下火線),希望佢哋都可以喺次回合候命。」施丹喺歐聯八強次回合贏禾夫斯堡場波high到爆褲,點知今場波都冇入,條褲一樣照爆,到底係邊間公司贊助褲畀佢,下次要搵條啲料彈性好啲嘅先得。
C朗喺次回合出唔出得成疑,呢邊曼城都有主力隨時喺下場缺陣,西班牙中場大衛施華拉傷大腿退下火線,領隊比歷連尼話冇乜機會可以喺一星期內康復。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載