› 選擇地區
三藩市
紐約
洛杉磯
其他美國地區
香港 台灣 北美
 
2016年05月01日

求驗客手記:寧信巴塞軍醫
C朗狂谷趕復出

皇家馬德里西甲爭標形勢被動,連神射手榜首都俾巴塞隆拿前鋒蘇亞雷斯過埋,歐聯睇怕都係皇馬同佢哋嘅首席射手基斯坦奴朗拿度(C朗)今季最後目標,不過有大腿肌肉傷嘅C朗,喺準決賽首回合作客曼城已經缺陣,為咗希望趕及周三次回合復出,「激戰式」狂操外,仲有傳佢向巴塞軍醫求教㖭。

學張家輝操弗備戰歐聯

C朗因為大腿受傷,上周六西甲皇馬作客對皇蘇已經唔使預佢,不過C朗都冇偷懶,喺個人ig上載自己日前狂操體能嘅相同片,好似電影《激戰》咁,學張家輝練戰繩,據講可以練爆發力、肌耐力同心肺耐力,C朗大腿有傷唔方便跑步,佢就游水練氣,好積極咁款。其實,有傷在身唔係應該搵軍醫治療咩?原來皇馬一眾球員都信唔過首席軍醫奧爾莫,C朗認為自己喺首回合冇辦法出戰,係因為軍醫診療失誤所致;原來奧爾莫一直認為C朗只係肌肉疲勞,只需要休息唔使治療,結果首回合賽前熱身又傷過,更發現大腿肌撕裂,佢老哥上周中返馬德里後,已經拒絕畀奧爾莫檢查。

傳皇馬軍醫會篤背脊

據親巴塞嘅《每日體育報》問C朗,如果巴塞軍醫出手幫佢治療,佢願唔願意接受,C朗都話冇問題;反映C朗信死敵嘅軍醫,都唔接受自己球隊軍醫。講真,奧爾莫都幾失球員信任,好似皇馬另一傷兵、法國前鋒賓施馬,就搵番上年俾奧爾莫炒魷嘅前軍醫祖安求助,更加將合照放上網,擺明落奧爾莫面。奧爾莫喺球員心目中就真係過街老鼠咁,傳聞佢係主席佩雷斯嘅密探,唔只醫球員,仲會向佩雷斯打球員小報告,上年10月皇馬隊長沙治奧拉莫斯已經講明,禁止奧爾莫入皇馬更衣室咁話。
不過雖然有內亂,皇馬呢期起碼都一條心,至少打低曼城入歐聯決賽先算,教練施丹喺上周六賽前記者會都仲好樂觀咁講:「唔會畀C朗同賓施馬冒險,但仍然有信心佢兩個可以百分百狀態次回合復出。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載