› 選擇地區
三藩市
紐約
洛杉磯
其他美國地區
香港 台灣 北美
 
2016年05月09日

求驗客手記︰
玩啤一晚贏2,800萬
班主維猜真賭神

英超新科冠軍李斯特城呢排人氣盛,連班主維猜都成為風雲人物。呢位泰國免稅店大王近期名成利就,竟然連賭運都超強,上周李城落實封王後,維猜到當地賭場玩吓啤牌都執成250萬鎊(約2,800萬港元),唔通泰國賭神先係佢嘅真正身份?
上周一熱刺作客俾車路士逼和,令李城可以提早封王,58歲嘅維猜就一路留喺當地,等上周六主場對愛華頓一戰後捧盃。咁講真吖,英國就冇咩娛樂,維猜上周三就去到李城嘅雲頂賭場玩番兩手,唔知到底係佢賭運勁,定真係啤牌高手,話咁易玩一晚就贏咗250萬鎊;佢老哥之前應承送每位球員一架值32,000鎊嘅Benz,今次贏到嘅錢已經夠買80架啦。

維猜之前仲應承向職球員派650萬鎊獎金,包括領隊雲尼亞里會獨得500萬鎊,睇嚟佢去多三次賭場就贏夠數,不過唔知英國賭場會唔會驚佢贏到爆廠,而backlist呢位「泰國賭神」呢?
咁講真,幾百萬鎊對維猜都只不過係碎銀箒,因為據《福布斯》嘅2016年財富榜,佢係泰國第四大富豪,全球就排第612位,身家有成19.4億鎊(約218億港元)。最近仲有傳佢除咗免稅店生意,仲想涉獵埋航空業,準備出資差唔多6,000萬鎊,向航空公司Air Asia收購泰國業務。

李城收入拍住洋基

錢又冇人會嫌多嘅,李城「灰姑娘式」成為英超冠軍,充滿話題性又夠勵志,雖然唔係英超傳統Big 4,但來季會晉身歐聯,門票、贊助同廣告收入都會豬籠入水;據英國《每日郵報》估計,李城喺2014/15年收入約一億鎊,喺全球球會財富榜排第24位,不過新季電視直播、贊助收入都會急升,有機會增加到2.6億鎊,財富榜可以上到去12、13位,比起𠵱家排第14位、前意甲同歐聯冠軍AC米蘭都要多,收入甚至拍得住MLB嘅紐約洋基,真係唔講得笑。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載