› 選擇地區
三藩市
紐約
洛杉磯
其他美國地區
香港 台灣 北美
 
2016年05月09日

體壇拾趣︰
奧運港將越洋賀母親節

凱華媽咪長居加拿大,去年12月難得回港同女兒聚會。照片由受訪者提供

母親節食大餐慶祝,對香港人嚟講好平常,但對於年終無休,時不時要出埠集訓同比賽嘅香港運動員嚟講,就唔係話咁易嘅事,好似三個里奧代表,「女車神」李慧詩、羽毛球混雙周凱華同乒壇新星李皓晴,噚日同媽咪分隔兩地,都不忘越洋講聲:「母親節快樂」!

慧詩感謝母親體諒

現正喺內地集訓嘅李慧詩,噚日朝喺fb有感而發:「記得小時候我和哥哥、姐姐總會畫卡表演,長大了一家人簡單吃一頓飯……現在因為常不在港,通個電話她也會滿足。感謝媽媽對我的體諒和支持,我家比較傳統,很少說『我愛您』,但我相信,愛在心坎。」

周凱華用佳績報答

凱華自05年從加拿大回流香港打波後,超過10年冇同喺加拿大住嘅媽咪一齊過母親節,佢噚日打長途電話畀媽咪,仲搞笑咁話:「五小福(周氏五兄弟姐妹)媽媽,祝你母親節快樂,對上一次同你慶祝母親節係10幾年前,好多時母親節都唔喺你身邊,但我知道你唔會怪我,我會繼續努力去攞好成績去報答你。」凱華今年同家姐哥哥夾份送護膚品畀媽咪,佢補充話:「禮物永遠都唔足夠表達我哋對媽咪嘅感謝,希望佢可以健康、開心、快樂。」
至於90後嘅李皓晴,目前身在北京集訓,佢同媽咪同一個餅印,而且感情好好。皓晴話當喺外面打波唔開心時,好感謝媽咪會想盡辦法令佢安心,佢話:「以前是媽咪同女嘅關係,長大後反而更似朋友,母親節我最想同媽咪講係『你放心,不用擔心我,我會努力。」
呢三位港將個個都咁乖,各位媽咪聽完,一定甜在心頭。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載