› 選擇地區
三藩市
紐約
洛杉磯
其他美國地區
香港 台灣 北美
 
2016年06月03日

求驗客手記︰
摩連奴玩親疏有別 傑斯勢走人

曼聯助教傑斯度完假返嚟,將會向球會請辭。據講新帥摩連奴親疏有別,屬意自己人費利亞做副手,變相削傑斯嘅權。儘管報道話摩帥會親自出手勸傑斯留低,但睇個勢機會唔大嘞。
喺雲高爾執教曼聯嘅兩年,傑斯都係佢副手,係一人之下、萬人之上,仲俾人話係曼聯高層欽點嘅雲高爾接班人㖭。不過,雲高爾今季帶唔到隊波入前四,做唔晒三年任期黯然下台,傑斯冇得上位之餘,仲俾人燉冬菇。

摩帥玩嘢明留暗降

英國《太陽報》話,新任魔君摩連奴想用番親信費利亞做阿二,負責日常訓練同戰術,至於傑斯就會負責聯繫一隊同預備組喎。傑斯收到呢個offer,唔使諗,肯定黑晒面!佢個心係想做曼聯領隊,點知領隊冇得做之餘仲被降級,所以佢決定走人都好正常。英媒就話摩連奴好想傑斯留低,會搵佢傾吓,但我求大俠心諗,你摩連奴開埋呢啲條件,明知傑斯唔會受,係咪真心留人都係個疑問。

朗尼賣口乖讚新老細

喺下周日,奧脫福會舉行一場慈善賽,由摩連奴同艾拿迪斯帶領嘅英格蘭明星隊對雲尼亞里嘅世界明星隊。好多球迷都食住花生,等睇摩帥嗰日喺奧脫福第一次以曼聯領隊嘅身份公開亮相,但據英媒透露,花生友要失望嘞,因為摩帥應該推咗場慈善賽,改由艾拿迪斯一個帶隊。摩連奴唔想自己喧賓奪主,外界淨係關注佢而忘記場慈善賽本身嘅意義,同埋佢發現曼聯領隊呢份工唔易做,所以分身不暇。
就算有空閒時間,摩連奴都寧願去學吓嘢,前日佢喺instagram上載咗張相,見到佢喺英國導演基里奇前面,好認真咁講緊嘢,唔通摩帥進修緊演說技巧?佢喺ig留言:「每個頂級表演者都需要一個頂級教練。」另外,摩連奴同意喺八月三號幫隊長朗尼搞紀念賽,曼聯嗰日會喺奧脫福對朗尼嘅母會愛華頓。摩帥咁識做,朗尼亦賣晒口乖,讚摩帥係世上其中一個最好嘅領隊。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載