› 選擇地區
三藩市
紐約
洛杉磯
其他美國地區
香港 台灣 北美
 
2016年06月27日

體壇拾趣:
K艾榮出征美籃添夢幻

寨卡病毒肆虐,令唔少NBA大牌球星都相繼放棄為國出戰里約奧運,不過美國男籃上周六終於傳出好消息!據《ESPN》透露,啱啱為騎士贏得隊史首冠嘅控衞K艾榮(Kyrie Irving)願意出戰里奧,帶領「夢幻隊」爭取三連霸!

火箭探班周琦得四分

眼見美國男籃大軍名單除咗安東尼(Carmelo Anthony)同杜蘭特(Kevin Durant)之外,所有球員都未試過出戰奧運,令唔少球迷都擔心佢哋三連霸嘅目標會失敗。不過,據《ESPN》報道,K艾榮喺上周六終於同意出戰里奧,令球隊嘅控衞人選唔只得洛利(Kyle Lowry)一人。值得留意嘅係,來自杜克大學嘅K艾榮係「K教練」科錫維斯基(Mike Krzyzewski)嘅得意門生之一,佢哋喺2014年曾經帶領「夢幻隊」喺世界盃封王,K艾榮仲榮膺最有價值球員(MVP)。另外,勇士主力K湯遜(Klay Thompson)、祖蒙特格連(Draymond Green)同H班尼斯(Harrison Barnes)都齊齊入選(見附表)。

「夢幻隊」喺A組首場就會同中國交手,相信火箭都會趁機睇吓新秀周琦面對一班NBA球星打成點。中國男籃𠵱家喺意大利集訓,火箭隊總經理莫利(Daryl Morey)日前都特登派球探去搵佢,不過周琦似乎留唔到個好印象畀火箭喇,因為中國上周六喺熱身賽以69:95不敵加拿大,呢位20歲中鋒只係上陣九分鐘,入得四分。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載