› 選擇地區
三藩市
紐約
洛杉磯
其他美國地區
香港 台灣 北美
 
2016年07月28日

求驗客手記:7.65億簽希古恩那有錢?
祖記碌爆普巴卡

𠵱家開電視不時睇到啲銀行、財仔廣告,生意周轉、去旅行甚至幫仔女報興趣班都要借錢。不過,堂堂意甲冠軍祖雲達斯咪又係先使未來錢?周二落實以7,530萬鎊(約7.65億港元)買斷合約,收購拿玻里前鋒希古恩,令佢一躍成為全球第三高轉會費球員。祖記咁揼本,無非都係有恃無恐,使定1.05億鎊賣保羅普巴筆錢箒。

經理人冇佣收叫停體測

祖記打咗呢位上季意甲神射手主意好耐,原本拿玻里唔想賣,但「斑馬兵團」出到7,530萬鎊買斷合約。據報祖記向希古恩開出五年合約,並準備分兩年找數畀拿玻里;希古恩周三完成體測,將取代艾華路莫拉達成祖記新「9號仔」。呢位阿根廷射手亦成為繼加里夫巴利同基斯坦奴朗拿度後全球第三高轉會費球員,身價仲比祖記當年以4,180萬鎊收購保方嘅舊紀錄足足高1.8倍㖭。不過,羅馬中場托迪就慨嘆今時今日忠誠何價,話呢單轉會簡直係災難。
咁貴買個28歲前鋒,好多人都話唔值。其實祖記呢次算係學拜仁慕尼黑咁作策略性收購,收購聯賽第二勁球隊嘅主力,下季要衞冕意甲自然更容易。不過,點策略性都要有錢,佢哋就學足港人先使未來錢,碌定張普巴卡──普巴唔係銀行或發卡公司,而係法國中場保羅普巴。曼聯睇中呢位23歲新星係公開秘密,連領隊摩連奴塊戰術板都寫定佢大名,又開埋過億鎊嘅全球最高轉會費,但普巴經理人拉奧拿要收2,500萬鎊佣金,紅魔同祖記唔肯找數,搞到拉奧拿原本安排普巴喺邁阿密體測都暫停。

拿玻里斟達美安救紅魔

祖記驚曼聯打退堂鼓之餘,據報佢哋都準備好晒普巴接班人,好似尼曼查馬迪同馬度迪等,又話想簽「新尼馬」加比爾巴保沙。至於拿玻里忽然做大富翁,使錢都唔執輸,斟國際米蘭前鋒莫路伊卡迪就要4,000萬鎊,仲想用1,000萬鎊帶曼聯右閘達美安返意大利,叫做幫補吓紅魔。
講開曼聯,摩連奴心情唔多靚,周二朝早六點幾由中國飛返曼市,兩個鐘後就要球員早操。契仔伊巴謙莫域周二就抵達曼市,估計佢仲會周六喺瑞典對加拉塔沙雷場友賽「地標」登場。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載