› 選擇地區
三藩市
紐約
洛杉磯
其他美國地區
香港 台灣 北美
 
2016年08月18日

咖喱牛腩:
華西重要過伊巴! - 咖喱

曼聯喺今季英超第一戰贏咗般尼茅夫,有人讚伊巴謙莫域有料到,艾歷拜利踢得好,費蘭尼鹹魚翻生之類,但小弟睇過呢場聯賽同社區盾,認為右閘路爾斯華倫西亞非常重要,亦踢得好好,係球隊進攻最不可缺嘅一環!
雖然曼聯買咗伊巴謙莫域、米希達利恩呢啲進攻好手,但喺紅魔呢兩場入面最有效嘅戰術,就係靠華西出波。曼聯呢兩場用連格同桑馬達打右翼,佢哋都鍾意走入中路,配合安東尼馬迪爾踢左翼,曼聯好多時都喺中路或左路傳嚟傳去,令到右路有較多空位。當左路塞晒車,曼聯就會突然轉方向,畀個波華西喺右邊同對手隻閘one on one;雖然華西淨係識一招推落底傳中,但佢又快又強壯,有時真係明推你,個後衞都冇計,焗住食塵。

社區盾入面,伊巴嘅頭槌入波就係來自華西壓落底線嘅傳中;喺聯賽對般茅入面,朗尼嘅頭槌入波同樣來自華西嘅傳中,馬迪爾撻Q畀朗尼頂入。呢招佯攻左路,吸引對方防線注意,再搵機會畀華西喺右路單對單落底,暫時睇唔到有邊個頂到佢喺呢套戰術嘅作用;達美安守強攻弱,速度又慢,而艾舒利楊格雖然係右腳,但踢左邊嘅水準往往比右邊高,相信都冇華西咁好。
點解呢套戰術最有效?其實同朗尼都有關。踢10號位嘅朗尼能力退化,反擊又拖慢節奏,但佢少有仲稱得上英超頂級嘅能力,就係用右腳傳右路嘅長傳。係!淨係右腳,同埋只限長傳去右路,傳去左路就唔掂㗎嘞。由於朗尼技術嘅局限,又霸住個10號位,所以曼聯係得呢招最有威脅,希望唔好咁快俾對手睇穿啦。文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載