› 選擇地區
三藩市
紐約
洛杉磯
其他美國地區
香港 台灣 北美
 
2016年08月18日

森巴Beats:義工狂OT飯盒都冇個
奧組委衰過霞姨

臨時演員都係演員,唔通義工就唔係員工?好似電影《喜劇之王》咁,跟霞姨開工做老臨,起碼都有個飯盒食,點估到堂堂四年一度嘅體壇盛事,里約奧運竟然咁刻薄義工?除咗要求佢哋返八、九粒鐘之餘,連飯盒都冇個,𠵱家引發義工逃亡潮,巴西奧組委先開始補鑊,考慮改善義工待遇。

三成義工no show累街坊

奧運一向都係透過全球招募義工,據報里奧呢次就請咗五萬幾名義工,香港都有20人幫手。原本做義工預咗冇報酬,甚至自費食宿、機票,都係為咗出心出力參加呢個盛事;不過,可能因為巴西治安同衞生問題多多,搞到三成義工臨時no show,有啲巴西人更加拎完義工制服同紀念品就唔見人,搞到巴西奧組委大失預算,惟有要求義工捱義氣加班。

好似住喺里約當地嘅23歲女仔瑪絲蓮娜(Aisha Marcelina)就大吐苦水,負責協助管理穿梭巴士嘅佢,俾大會要求朝早六點就開工,由於佢搭巴士返工要成兩粒鐘,結果朝朝凌晨兩點半就起身梳洗兼食早餐去開工,慘過耕田。正所謂有開工冇收工,瑪絲蓮娜又話大會成日叫佢開OT,搞到收工後好鬼攰,原本打算買飛入場睇比賽,但做義工太辛苦,𠵱家已經唔打算入場嘞。除咗超長工時,連待遇都差過人,負責排球館觀眾入場安排嘅摩連拿(Luis Moreira)就話:「一日平均要返八、九個鐘,不過大會連飯盒都冇提供,淨係畀咗包零食我,當我免費勞工咁,我決定辭職嘞。」奧組委終於知驚,傳訊總監阿當斯話會方已經盡力改善義工待遇,又話真心感謝佢哋為奧運嘅付出喎。

北京靚女「集郵」補番數

不過,對有啲義工嚟講,有冇飯食,辛唔辛苦都唔係最重要,最緊要係見到偶像。好似一位來自北京、網名係「我還要再改個名字」嘅靚女義工,就喺個人微博狂晒自己同易建聯、寧澤濤、孫楊等體育明星嘅合照,又喺耶穌山前自拍,似乎幾享受呢次義工之旅。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載