› 選擇地區
三藩市
紐約
洛杉磯
其他美國地區
香港 台灣 北美
 
2016年09月06日

求驗客手記:禁球員交換波衫
紅魔咁孤寒做乜!

「大富由天,小富由儉」,英超豪門曼聯今夏使咗1.5億鎊(約15.4億港元)擴軍,又冇份踢歐聯,就算英超開季保持長勝,都唔代表賺多咗錢;曼聯班主格拉沙家族出名密底算盤,為咗開源節流,竟然唔准球員今季同對手交換波衫,一場波可以慳番660鎊(約6,830港元),又唔知幫到幾多手。
英國《太陽報》周日引述曼聯內部消息報道,紅魔新一季開始以浪費成本為由,唔畀球員同對手換波衫。據報曼聯只會向球員發放每款波衫短、長袖各兩件,唔理你係隊長朗尼定天王伊巴謙莫域,都係得咁多;如果球員自行交換波衫,就唔夠應付餘下比賽,甚至連送畀球迷都唔准。

慳成季唔夠伊巴日薪

球會以財政理由限制換波衫,一般都係發生喺低組別球隊身上,好似英乙劍橋聯上季出戰英足盃,就因經費問題唔畀球員換波衫,但發生喺曼聯身上就認真奇怪,事關紅魔𠵱家市值達200億鎊,兩年前仲同「三間」簽咗冠絕英超嘅10年7.5億鎊波衫贊助合約,話晒交換波衫都有宣傳價值,三間有咩理由咁孤寒?報道冇講到球員可唔可以自掏腰包買波衫交換,不過禁令生效後,曼聯一場波最多可以慳到660鎊,一季38場聯賽最多可以慳到大約25,000鎊;查實伊巴周薪已經26萬鎊,慳埋一季波衫錢,都唔夠畀伊巴一日人工。

迪基亞送衫冧小球迷

講開波衫,曼聯嘅西班牙門將迪基亞就大方得多。西班牙周一喺西北部小城市利安出戰世界盃歐洲盃外圍賽對列支敦士登,利安球迷可能少見球星,周日趁國家隊收操後就衝入球場,其中一個小球迷仲死拉住迪基亞隻腳;迪基亞為咗安撫小粉絲,就將自己件練習波衫送畀佢,不過如果佢喺曼聯咁做,就可能要破財喇。
曼聯點解要慳錢?好大程度都係因為增兵,好似買中堅艾歷拜利就使咗3,230萬鎊;不過,科特迪瓦周日喺非國盃外圍賽出線,出年一、二月要出戰決賽周,到時拜利可能要離一離隊,一月對利物浦、二月尾對曼城都可能踢唔到。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載