› 選擇地區
三藩市
紐約
洛杉磯
其他美國地區
香港 台灣 北美
 
2016年09月12日

求驗客手記︰
特別的人變凸出的人
摩佬天賦異稟

曼聯前晚喺英超曼市打吡主場輸畀曼城1:2,領隊摩連奴賽後喪插球證卡頓保之外,仲明示隊中有球員唔夠班;其實佢唔使咁勞氣呀,雖則又再輸俾哥迪奧拿,但至少有樣嘢應該贏硬;皆因林柏特個表哥列納日前唔覺意爆響口話摩佬天賦異稟,仲話佢執教車路士時,俾班球員叫做「凸出的人」㖭呀。

列納講波爆摩佬好凸出

家陣喺電視台講波嘅列納日前上英國名嘴James Corden嘅節目,冇嗱嗱大爆摩佬嘅更衣室秘密。Corden咁問佢:「你表弟林柏特好了解摩佬,摩佬係咪浪漫到爆㗎?」點知列納咁答:「林伯同我講摩佬唔係『特別的人』,而係『凸出的人』囉。」於是Corden追問:「因為佢有啲嘢好大?」列納回應:「咪就係呢樣嘢囉。」至於摩佬嘅天字第一號愛將伊巴謙莫域一樣咁「大支嘢」,但大家唔好心邪,只係講緊佢喺輸咗場曼市打吡之後,死狗都冇扮吓,仲嗱嗱臨飛去倫敦O2體育館睇高洛雲對布魯克場拳賽,而且心情大靚,係咁同啲粉絲自拍,似乎唔記得咗佢隊波啱啱輸咗波。

左貶球員右插球證

雖然摩佬俾列納爆佢天賦異稟,但應該暫時未得閒搵列納算賬,因為呢位葡萄牙名帥要啲時間去執番好曼聯。摩佬喺輸咗場曼市打吡後咁話:「我哋有幾個球員明顯唔係好夠班。」雖然佢冇開名講係邊幾個球員,但係人都知佢插緊戴利白蘭特、米希達利恩同埋連格。其中連累球隊輸第一球嘅荷蘭守將戴利白蘭特,之後都應該冇運行。另外,佢又批評被認為係曼聯御用球證嘅卡頓保吹得差,有兩球12碼都冇畀到,同埋冇將飛鏟朗尼嘅曼城門將哥迪奧巴禾趕出場。佢好唔滿意咁話:「卡頓保喺下半場吹得好差,結果搞死我哋囉。」
話時話,喺英超處子登場嘅哥迪奧巴禾表現麻麻,而且仲派膠,接波甩手搞到俾曼聯前鋒伊巴謙莫域攻入今季第五球,但賽後領隊哥迪奧拿仍然力撐:「今場曼市打應該係巴禾其中一場代表作囉。」講真,如果曼城最終喺奧脫福由贏變輸,睇怕巴禾會畀哥迪奧拿插到暈囉。此外,曼城後衞高拉洛夫呢場好搏命,打到連隻門牙都甩埋,哥迪奧拿仲好識做,大讚球隊條防線踢得好好。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載