› 選擇地區
三藩市
紐約
洛杉磯
其他美國地區
香港 台灣 北美
 
2016年09月14日

求驗客手記︰ 「愛」心送暖
盧卡古戴帽贏黑貓

海牙周日喺荷甲作客飛燕諾,佢哋球迷自發送公仔畀獲邀入場睇波嘅病童,可惜最終都輸1:3。不過,捐咗20萬鎊(約207萬港元)畀新特蘭患癌小球迷嘅愛華頓就好心有好報,周一喺英超靠盧卡古喺11分鐘內完成帽子戲法,結果喺光明球場大炒新特蘭3:0。黑貓頭四場英超一和三負都未贏過,佢哋領隊莫耶斯都應該感受到壓力。
愛華頓周一喺英超夜場作客新特蘭,佢哋前鋒盧卡古賽前經已1,139分鐘冇入波,但呢個比利時國腳一係唔入,一入就入三粒。佢喺11分鐘內頭頂腳踢連入三球,最終協助拖肥糖大勝3:0,兼喺頭四場聯賽錄得三勝一和。暫時喺聯賽榜排第三位。

捐錢助新特蘭癌病童

呢場比賽佢哋贏波之餘贏埋掌聲,事關佢哋捐咗20萬鎊畀一個病童。賽前新特蘭前鋒迪科爾拖住一個叫路維利嘅五歲小球迷入場,原來路維利患有一種罕見嘅神經母細胞瘤,佢家人好努力幫佢籌70萬鎊去美國醫病。
喺比賽之前,新特蘭呼籲入場球迷每人捐一鎊幫幫路維利。場波打到五分鐘嘅時候,光明球場內42,406個球迷仲鼓掌一分鐘,以示對路維利嘅支持同埋鼓勵。
為咗幫路維利呢個勇敢對抗病魔嘅小朋友,愛華頓賽後宣佈捐出20萬鎊,同埋邀請路維利同佢家人喺明年2月25號去葛迪遜公園睇次循環聯賽。

莫耶斯鬥老東家冇運行

另外,佢哋仲會拍賣球員喺周一着過嘅簽名波衫,籌得款項會捐畀路維利個抗癌基金。拖肥糖領隊朗奴高文賽後喺社交網站咁話:「我哋個主席真係冇得彈!」話時話,莫耶斯離開愛華頓之後三次先後帶領曼聯同埋新特蘭對舊球會都輸晒,真係好黑仔。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載