蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年10月01日
馬上成為壹會員

求驗客手記:
助教亂畀指示fake普巴
摩佬贏波照噴火

做得摩連奴條𡃁,首要條件係要接受到當住幾萬人面前俾佢鬧。曼聯周四喺歐霸盃終於開齋,靠伊巴謙莫域近門頭槌頂入,喺A組次輪分組賽小勝來訪嘅烏克蘭球隊索爾亞1:0,但領隊摩佬賽前發現助教施拉畀錯指示保羅普巴,於是即刻嚟料發火,走向後備席噴到施拉一面屁。

「我希望副手留意細節」

外界賽前估計摩佬會出弱陣,點知呢位葡萄牙籍主帥冇咁做,仲畀艾歷拜利、基斯史摩寧、普巴同伊巴等主力打正選。由於索爾亞臨開波前郁咗個正選陣,所以摩佬趁對手影緊團體相時同普巴講解新戰術,但普巴顯得一頭霧水,唔知自己要mark邊個球員;摩佬同副手費利亞傾完一輪之後,怒氣沖沖跑去後備席找晦氣,仲兜口兜面對住助教施拉做出「1、2、3」嘅手勢,似乎係鬧緊對方聽咗咁多次都做唔到要求,冇帶個腦返工。
上季教車路士嗰陣試過喺場邊鬧爆女軍醫伊娃嘅摩佬,賽後講番件事:「係同死球、組織有關。索爾亞賽前郁咗個正選陣容,但普巴有啲混亂。好明顯,我希望我班副手會小心留意全部細節囉。」

朗尼世紀撻Q變「助攻」

俾摩佬鬧到狗血淋頭嘅施拉之前都喺車仔做,喺紅魔就負責做影像報告同訊息圖表;消息指,施拉呢次撈亂咗啲file,結果向普巴畀咗一堆混亂訊息。
講番場波,伊巴喺69分鐘接應後備落場嘅朗尼世紀撻Q「助攻」,近門頂入致勝球,仲成為繼羅馬尼亞前鋒梅度同挪威前鋒卡維之後,第三位幫七間球會喺歐洲賽入波嘅球員。雖然紅魔只係小勝索爾亞1:0,不過能夠喺三連敗後連贏三場,摩佬都話收貨:「一個禮拜輸三場,之後又一個禮拜贏三場,但我唔會因為連輸幾場而情緒低落,亦唔會因為連贏幾場而飄飄然。呢場波好難打,上半場我哋有好多機會,如果入到波,情況會截然不同。」曼聯下周日會喺主場同史篤城踢英超,雖然後備落場嘅朗尼助攻畀伊巴頂入,不過摩佬近排鍾意用伊巴夥拍桑馬達、連格同拉舒福特打進攻,睇嚟朗尼短期之內都要繼續坐冷板凳。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載