› 選擇地區
三藩市
紐約
洛杉磯
其他美國地區
香港 台灣 北美
 
2016年10月06日

Thursday:巴神遠離煩囂成熟時 - 咖喱

喺季初有好多狀態大勇嘅前鋒,好多都有份喺嚟緊周末踢國際賽,其中有位只可以喺屋企睇電視,佢就係巴洛迪利(右)。小弟一直好想講吓巴神,但冇乜機會,正因冇乜機會講佢,對佢係一件好事。
尼斯似乎係球壇嘅回收基地,上季拯救過賓艾化,呢季就到巴洛迪利。巴神今季已經有五個法甲入波,包埋歐霸盃嘅話,佢近三場比賽射入四球。之前有報道話,意大利主帥雲杜拿想重召巴神,但最後佢都係冇份。暫時呢兩個月,小弟戥巴神開心,因為聽親佢啲新聞都係入波,而唔係任何花邊醜聞。巴神家陣唔係踢班霸,傳媒嘅關注度低咗,同埋法國啲小報冇英國咁恐怖;英國啲狗仔真係可以24小時睇實巴神一舉一動,再將佢嘅小事放到極大,有時困擾住佢,有時就令到佢自我膨脹。希望家陣尼斯安靜嘅環境可以幫到巴神搵番條康莊大道。
雖然細細個就聽巴神個名,但佢都係26歲箒,對於職業球員嚟講,啱啱先踏入全盛期;而對於向來遲熟嘅意大利球員,巴神仲有大把世界。如果巴神今季可以保持到呢兩個月嘅水準,出年夏天,意大利正選前鋒一定係佢!啱啱場聯賽,巴神冇做過乜嘢,但被球證罰第二面黃牌離場,嗰陣巴神好冷靜,冇發脾氣;至於球證賽後亦承認犯錯。小弟估計球證可能被巴神以往嘅印象影響,所以誤判。巴神除咗要時間搵番狀態,亦要幫自己洗底,避免將來受更多不公判決。
意大利國家隊有個傳統,由1970年起,每隔12年就會入一次世盃決賽,兩年後嘅俄羅斯世盃,又係時候嘞,希望到時可以見到巴神嘅風采。
文:咖喱

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載