› 選擇地區
三藩市
紐約
洛杉磯
其他美國地區
香港 台灣 北美
 
2016年10月20日

體壇拾趣:
歐鎧淳唞夠望戰亞運

三位靚女飛魚歐鎧淳(左起)、鄭莉梅及江忞懿昨穿着整齊里奧隊服出席頒獎禮。徐嘉華攝

「里約奧運後,我有唔少新嘗試,發覺自己最鍾意仲係游水。」香港「美人魚」歐鎧淳噚日化晒妝、束起秀髮到體院出席賽馬會優秀運動員頒獎禮,原來近期連泰拳都玩埋嘅佢,最想戰2018亞運接力賽,希望同隊友重溫今年八月里奧接力賽嘅歡樂時刻,而「女車神」李慧詩(Sarah)將於下月11日出戰喺荷蘭舉行嘅世界盃。

慧詩獲37萬奧運獎金

歐鎧淳喺里奧開幕禮持旗後被譽為「東方維納斯」,佢話希望市民從佢開始關注更多本港運動員。已復操半個月嘅歐鎧淳近期連泰拳都玩埋,佢話:「其實上咗泰拳兩堂課,都係發覺自己游水叻啲。」佢明年三月喺香港短池賽正式復出,同埋計劃同其他隊友參戰2018亞運接力賽。
賽馬會噚日向里約奧運達到前16名成績嘅港將,頒發超過400萬港元獎金,現正喺日本出戰凱林賽嘅Sarah憑凱林賽及爭先賽兩個成績,獲全場最大筆嘅37.6萬港元獎金,港隊總教練沈金康噚日出席頒獎禮嗰陣,首次講到愛徒今次到日本參戰情況:「過去四年,慧詩為備戰里奧嘅過程非常唔容易,佢一直處於高度緊張狀態,今次去日本,佢可以喺輕鬆環境下比賽,對佢未來嘅世界盃都好有幫助。」
下月四號喺格拉斯哥舉行嘅第一站世界盃,先由小師弟梁峻榮領軍,國際車聯(UCI)上周六決定將佢嘅主項全能賽由世界盃開始採新例,由以往兩日六個賽項,改為一日過進行四項;佢話要慢慢了解新制,不過認為多咗集體出發嘅比賽,變數大咗,對亞洲選手係個追近國際強手好機會。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載