› 選擇地區
三藩市
紐約
洛杉磯
其他美國地區
香港 台灣 北美
 
2016年10月24日

體壇拾趣:
眼利觀眾「痣」救孫楊宿敵

有觀眾睇里約奧運時發現賀頓心口粒痣(左圖紅圈示)變大咗,賀頓(右圖)接受手術切除粒痣後,亦多謝呢位有心人。
互聯網

全球好多觀眾都見證澳洲泳手賀頓喺里約奧運男子400米自由泳擊敗中國嘅「1,500米之王」孫楊奪金,但澳洲一位透過電視睇賀頓比賽嘅人,見到呢位「袋鼠國」泳手心口粒痣有異樣,就即刻發電郵建議賀頓盡快檢查吓粒痣,估唔到咁就救咗賀頓一命!
由於澳洲係全球皮膚癌患者比率最高嘅國家之一,有調查指當地每年都會有大約2,000人因為皮膚癌逝世,而年滿70歲嘅人更有三分二係皮膚癌患者。一位透過電視直播睇住賀頓出戰里奧嘅觀眾,留意到賀頓心口其中一粒痣比以前變得更大同更深色,就即刻聯絡澳洲泳隊,仲建議賀頓快啲去搵專家檢查嗰粒痣係咪惡性黑色素瘤。賀頓近日已經喺墨爾本接受手術切除粒痣,佢仲自拍一張赤裸上身嘅相放上社交網站:「多謝嗰位發電郵畀泳隊醫生兼嗌我檢查吓粒痣嘅人。呢個係一個好決定,好好嘅決定!」

強國網軍咒生皮膚癌

賀頓喺里約奧運嘅男子400自以0.16秒力壓孫楊奪冠,事後呢位20歲澳洲泳手仲寸孫楊食禁藥,導致一班強國嘅玻璃心網民去轟炸佢嘅ig;呢班網民近日喺ig睇到賀頓呢張相,就梗係把握機會繼續留言洗版啦!有人嗌賀頓盡快向孫楊道歉,有人老屈賀頓生黑色素瘤係因為食咗禁藥,仲有人詛咒賀頓快啲因為皮膚癌而死。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載