› 選擇地區
三藩市
紐約
洛杉磯
其他美國地區
香港 台灣 北美
 
2016年11月08日

求驗客手記︰紅魔反底捉天鵝
大三巴起動鳥

呢排曼聯唔掂,除咗領隊摩連奴之外,就以「大三巴」嘅壓力最大,因為佢哋係隊中三個最大牌嘅球員。喺禮拜日場波,「大三巴」終於發威,伊巴謙莫域同保羅普巴入波,「月巴」朗尼就有兩次助攻,幫曼聯作客3:1輕取史雲斯,取得近五場英超首勝。美中不足嘅係,伊巴儲夠五張黃牌,下輪對唔到阿仙奴。

解釋番先,曼聯嘅「大三巴」組合係指伊巴、普巴同朗尼呢三位大牌;朗尼因為嘅身型關係,所以佢有個花名叫「月巴」。曼聯季初成績唔好,佢哋三位俾人插得最多,朗尼一早已經做咗箭豬,被插冇速度、冇技術、剩係識分邊。普巴背負住8,900萬鎊(約8.6億港元)嘅世界紀錄身價,幾場冇入波已俾人話係水貨。35歲嘅伊巴陷入球荒,亦被人話「老屎忽」,阻住安東尼馬迪爾同拉舒福特上位。喺周日呢場比賽停賽嘅摩連奴就一於少理外界批評,出齊「大三巴」。雖然曼聯進攻唔太流暢,同利物浦、阿仙奴比差得遠,但靠呢三位大牌嘅個人能力,都夠贏史雲斯。

伊巴領黃缺戰阿仙奴

15分鐘,朗尼回傳,喺伊巴力壓下,史雲斯後防解圍唔遠,普巴喺禁區外窩利一抽射成1:0。21分鐘,朗尼橫傳,伊巴喺娥眉月頂推一步起腳射入;呢球仲係英超創立以嚟嘅第25,000球,相當有意思。33分鐘,朗尼斜傳畀伊巴,後者扣過守衞射成3:0,梅開二度。換邊後,曼聯踢得冇咁好,被史雲斯嘅雲達賀奧破蛋,最後紅魔作客贏3:1,終止聯賽連續四場不勝嘅頹勢。不過,伊巴喺76分鐘被罰黃牌,儲夠五張,下場大戰阿仙奴要停賽,到時真係要靠福仔同馬迪爾嘞。

摩佬勁鬧史摩寧梳爾

雖然贏波,但摩佬都有批評球員,佢係好似啲上咗位嘅「老屎忽」鬧廢青咁,暗示呢場冇披甲嘅基斯史摩寧同勞基梳爾唔捱得,「史摩寧話有啲痛,踢唔出百份百水準,梳爾朝早都同我講佢唔喺狀態。」其後佢再話:「每項體育運動入面,喺最高水平嘅競技上,有幾多人、幾多次可以百份百狀態比賽?我有個朋友係打網球嘅,佢話自己忍住痛打嘅比賽仲多過唔痛嘅。如果我問曼聯班名將,相信佢哋都會話成日喺唔夠百份百狀態嗰陣拼搏。為咗團隊,你一定要全力以赴,呢個係我嘅看法。」

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載