› 選擇地區
三藩市
紐約
洛杉磯
其他美國地區
香港 台灣 北美
 
2016年11月09日

求驗客手記:續約攞獎 日以繼夜
C朗忙過亡國興

基斯坦奴朗拿度(C朗)前日真係好鬼忙,要出席兩個大型活動,晏晝先去巴拿比奴同皇家馬德里續約,夜晚就除低副眼鏡,改着黑恤衫,喺《馬卡報》頒獎禮上拎咗上季西甲最佳球員。雖然日以繼夜、夜以繼日咁攞「獎金獎品」,但C朗都話呢日好特別。

續約到2021年有排踢

C朗禮拜一晏晝以「四眼look」出席續約儀式,一身裝扮都casual啲,白色恤衫配黑色吊腳褲,再着對黑色波鞋。31歲嘅C朗就喺阿媽見證之下,同皇馬續約到2021年。C朗似乎想效法托迪、保方呢啲不老傳說,話希望之後仲有得再續約,踢多十年都冇問題。喺巴拿比奴簽約、講話同影相,搞完一輪之後,C朗仲未可以返到屋企休息,而係換件衫,趕去夜晚嘅西班牙《馬卡報》頒獎禮。

膺上季西甲最佳球員

雖然皇馬上季拎唔到聯賽冠軍,但C朗射入35球同交出11次助攻,仍獲主辦單位選為上季西甲最佳球員,拎咗迪史堤芬奴獎。同日續約兼攞獎,C朗都話好開心,「今日(周一)真係好特別嘅一日,一日內續約同拎咗《馬卡報》嘅獎,我仲可以奢求啲咩?上季真係有好多美好嘅回憶,先拎歐聯,再攞歐國盃。呢個獎會鼓勵我繼續努力,喺未來幾年踢得更好。」皇馬喺今季西甲排緊榜首,第四次得獎嘅C朗講吓西甲爭標形勢,「同預期嘅情況差唔多,呢場唔係短跑而係馬拉松,我哋要繼續戰鬥。」
>除咗C朗外,艾華路莫拉達拎咗西班牙國家隊最佳球員,佢話今季會以C朗為目標,「我希望到季尾嗰時,我嘅入球數量可以同C朗差唔多啦。」馬德里體育會的施蒙尼奪得最佳教練,而奧比歷就係上季最佳門將,至於巴塞隆拿嘅蘇亞雷斯就係最佳射手。不過,皇馬噚日收到個壞消息,中場卻奧斯右腳蹠骨骨裂,至少休戰六個星期,嚟緊對巴塞同馬體會都冇得上陣。

睇盡世界體壇大小事,即Like「體蘋果」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載